香港有好多間火鍋店，但都係港式同麻辣嘅多，越南火鍋好似冇乜幾多間。最近銅鑼灣就有間打正旗號做正宗越式火鍋同串燒嘅專門店開業，就連裝修格局都帶有越南風味呢。

越南火鍋同我哋平時打開嘅邊爐，最大分別就係佢哋啲配料會圍住晒個爐邊放，生熟都係。主要係海鮮、肉同埋菜。好似呢個越式豪華火鍋咁，圍住爐邊就擺滿咗蜆、牛肉、魷魚圈、濱海同埋菜，中間係鮮茄蟹湯，真係撈到蟹肉上嚟食架！師傅每日新鮮熬製5個鐘，以全隻鮮蟹加入蕃茄、蝦米同調味料等製作，啖啖濃香嘅蕃茄味同鮮味。而跟配嘅醬料，則以魚露同特製嘅越南辣椒醬製成自家火鍋醬，辣辣地帶出更多海鮮鮮味。

鍾意蕃茄嘅朋友仔，覺得火鍋份量太多嘅話，可以揀鮮茄濃湯蟹濛，一樣可以試到個蕃茄味濃郁嘅湯底，重有好多料添。豬紅魚蛋豆卜等等，最重要當然係面頭嘅蟹肉啦。

另外，餐廳亦有提供多款越南美食，扎肉法包份量超大，即叫即烘，脆脆der。夾住甜甜酸酸嘅白紅蘿蔔絲醃菜、芫荽、辣椒、肉鬆等等，而扎肉都有三款唔同口感同味道嘅扎肉，分別係原味、加入豬耳，同燒過嘅。一啖咬落去口感極豐富，同埋有少少辣。

蒜香牛油雞翼嘅牛油味好重，係幾香嘅，會一方面停唔到口但一方面又有少少罪惡感咁，因為你知道師傅一定落得好重手呀科科。

串燒拼盤可以話係其中一道招牌菜。因為主廚嚟自北越，佢就將佢家鄉名菜越式串燒帶埋過嚟，親自醃製，重係用真‧碳烤爐烤嘅，所以不論係雞肉豬肉定牛肉串都有陣陣炭香。

 越南滴咖啡

SO TAM   
地址：銅鑼灣羅素街8號英皇鐘錶珠寶中心2樓

文、相、片：Kar