成日都話做嘢辛苦，要食餐豪嘅獎勵下自己，咁一於就食餐「蠔」啦~ 銅鑼灣新開咗間主打日本牡蠣料理嘅餐廳，係日本著名燒肉店Yakiniku Kakura嘅新品牌。一入門口就已經見到有成個放滿唔同產地嘅牡蠣冰櫃，相當吸睛。

主廚末永陽一先生嚟自福岡，有超過20年入廚經驗，對於處理牡蠣料理更有一手。餐廳每日大約供應10款牡蠣，均由專人喺日本北海道、岩手縣等10個縣巿搜羅，凌晨2點將食材運到日本機場，下晝4點就送到香港，舖頭更設有電解水裝置，力保牡蠣嘅鮮味唔會流失。

想一次過試到最多唔同口味嘅生蠔嘅話，一定係揀牡蠣盛合。由主廚親自調配8款口味嘅醬料配搭，由淡至濃分別有番茄清湯啫喱、煙三文魚慕絲、刁草檸檬啫喱、乾蔥酢、柚子啫喱、大葉啫喱、海膽牛肉清湯啫喱同泰辣青檸。生蠔本質清爽，配搭各種口味使層次更為豐富。

 刁草檸檬啫喱(左)、柚子啫喱(右)

 海膽牛肉清湯啫喱(左)、泰辣青檸(右)

要數較特別嘅則有鹹鹹酸酸嘅刁草檸檬啫喱同埋柚子啫喱；另外，海膽牛肉清湯啫喱真係有些微嘅肉香唧出嚟，食得辣嘅朋友仔應該會最鍾意泰辣青檸。反而大葉啫喱就帶有甘苦嘅草青味，味道較重，未必人人接受到呢。

熟食牡蠣嘅選擇都有唔少，其中蒜片欖油生蠔啖啖都係濃香蒜味。

廣島蠔拉麵亦有多隻飽滿嘅生蠔，蠔肉creamy，以蔬菜、雞肉同海鮮熬製嘅湯底仲好清香，帶有淡淡海鮮嘅甜味。

除咗牡蠣料理外，餐廳亦有串燒同清酒供應，燒黑豚小排肉質嫩身，雞頸柳肉亦相當細嫩；肥美可口嘅雞腿肉嚟自佐賀縣。所有串燒都係師傅以日本醬油即場調味同燒烤，可以細味得到陣陣炭烤香味。食天草大雞翅嘅話，就要稍稍放低偶包同儀態，用手拎住成隻食先最滋味。

牡蠣酒場   
地址: 銅鑼灣謝斐道535號Tower 535 1樓101-102號舖
訂座同時訂餐：牡蠣盛合配白酒二人餐 (低於8 折)

文、相、片：Kar