復活節長假期，唔係唔畀個機會自己放鬆下唞下氣吖嘛？嚟到銅鑼灣呢個鬧市，轉角居然有間令人見到就心情特別好嘅悠閒Cafe，最近仲出咗火焰意粉同特調花生醬手打牛肉漢堡等吸睛美食，呢個美食治愈「療程」，適合各位為食友服用！
 

GoodDay Cafe Keep住有唔同新嘢出，最近就有呢碟超吸睛嘅火焰濃香芝士忌廉什菌雞肉意粉！ 意粉上枱後會由廚師用火槍點著一細杯伏特加，淋上意粉後燒大概六至七秒，記得準備好手機影低放上Instagram呃Like呀。
 

燒過後先撈勻，再隨意灑上辣粉同紫菜就大功告成！聞到陣陣酒香，但食落味道唔會太啃，而且香味同白汁非常夾。意粉al dente得嚟亦夠掛汁，稍嫌芝士香被酒香蓋過。另外鐘意重口味嘅不妨落多啲辣粉，多一重香味刺激。
 

特調花生醬手打牛肉漢堡之前開飯仔喺Facebook都有提及過，其實美國台灣等地亦非常流行花生醬同漢堡包呢個配搭，今次店主就用咗有一粒粒花生粒嘅花生醬，再細心調校成適合香港人口味嘅輕怡版本。
 

特調醬嘅花生香味濃郁，加埋一粒粒花生口感相當特別。另一亮點係手打牛肉漢堡扒非常柔嫩，配埋青瓜同番茄，味道比想象中嘅更Light，細食嘅女士們都絕對可以輕易KO半個。
 

而且佢地仲有唔少手工啤酒提供，配埋特製流心芝士炸魚薯條一齊食就Perfect！
 

趁熱切開炸魚柳，裡面嘅半融車打芝士就會慢慢流出嚟，啤酒炸漿輕薄香脆，魚肉亦夠嫩滑。加埋外脆內糯嘅薯條，喺Cafe都可以嚟個Happy Hour！
 

Cafe細細但選擇非常多，咖啡有齊特濃咖啡、Latte、Mocha等大路選擇，Cappuccino上面仲會有個笑臉拉花，睇到心情都自然好。
 

注重養生嘅朋友仔就必試佢地嘅Homemade系列，香茅檸檬美顏薏米水同蘋果雪梨茶配肉桂條都係由店主親自煲足兩至三嘅鐘先拎出嚟賣，天然又好飲。另外亦有鮮果乳酪奶昔、果汁同花茶等，令你呢段美食「療程」更滿足。
 

好日咖啡店 GoodDay Cafe
地址：銅鑼灣希雲街12號地舖
營業時間：星期一至四，星期日：11:00-21:00；星期五至六：11:00-23:00

文、相：Cathy
片：Kar