中國菜唔止得粵菜或者京川滬菜，淮揚菜都係四大菜系之一，泛指江蘇省淮安、揚州、鎮江一帶地方菜，有啲似上海菜，但就更加細膩精緻，尤其著重刀工。十里洋場就係最新淮揚菜館，啱啱喺銅鑼灣利園開業。食物由經驗豐富嘅陳曉鶴及欒華宏師傅主理，陳師傅曾於上海多間名店及政府部門任廚，專為官員政要設宴，而欒師傅亦為本地多間著名食府主廚。所有菜式忠於傳統，加入少少新元素，幾有特色。
最犀利係呢一道蓑衣黃瓜，青瓜以人手切到超薄兼工整均勻，目測厚度得1mm，刀工細膩到神乎奇技！伴碟嘅蒜苗來自荷蘭，帶微微蒜香，連青瓜同甜醬油加埋一齊食，有啲似食拍青瓜。
蓑衣黃瓜 $68
黑松露珍珠溏心蛋用鴨蛋製作，用糖及龍井茶葉煙燻約分半鐘，加上意大利黑松露珍珠及淮鹽，帶有陣陣茶香，蛋香亦濃郁。
黑松露珍珠溏心蛋 $48
另一道煙燻菜式為茶皇煙燻脆皮雞，文昌雞風乾後煙燻30分鐘，上枱時玻璃罩內以荔枝木再煙燻60秒，一開又聞到煙燻香氣，食落雞皮香脆肉質嫩滑。
茶皇煙燻脆皮雞 $268/半隻，$498/一隻
其他菜式都好考手工，迷你葫蘆八寶鴨，用鴨頸皮包住鴨肉、雞肉、糯米飯等多種食材，再紮成葫蘆形，再喺頂放上鴨舌，造型可愛，亦唔使食成隻鴨咁多。
迷你葫蘆八寶鴨 $268
茶香油爆蝦用江蘇河蝦仁，細細隻但好鮮甜，用龍井茶製成醬汁同炒，脆卜卜，連殼都食得！另一款蟹粉炒蝦仁，更係人手剝殼，蝦肉晶瑩彈牙。五花腩經香料醃製再炆煮，再片至薄身，一層一層砌成金字塔狀，入面釀入梅菜，就成為呢一道東坡千層寶塔。
茶香油爆蝦 $88、東坡千層寶塔 $268 （需預訂）
點心同甜品都唔錯，小籠包先蒸後煎，用鐵板上枱，肉汁仲係滾熱！蘿蔔絲酥加入龍蝦製作，更加奢華鮮甜，葱油拌麵有原隻鮑魚。梳乎里以桂花糖及橙酒製作，淋上杞子雲呢拿忌廉汁，香甜帶中式風味。
脆煎灌湯小籠包 $60
龍蝦蘿蔔絲酥 $168、蟹黃大湯包 $58
桂花柑曼怡梳乎里 $98
餐廳足足7,000呎，裝修華麗有氣派，設計靈感源自30至50年代舊上海，大廳鎢絲燈膽同舊化鏡面天花感覺懷舊，周末仲有現場演奏，有「夜上海、夜上海」氣氛。
地址：銅鑼灣恩平道28號利園二期101號舖
文、相、片：Perrins