留喺香港都食到日韓人氣小食！皆因銅鑼灣Sogo B2層嘅超級市場即日起至4月10號舉辦日韓美食節，最吸引嘅係有唔少即整小食，包括韓國蟹膏紫菜飯卷、醬油蟹拌飯、日式玉子燒、關東煮等等。約埋朋友去銅鑼灣掃街啦！
 

韓國人氣蟹膏登場

GS25蟹膏紫菜飯卷（$30/份）

韓國GS25便利店嘅紅蟹膏早前引起熱潮，就算飛到韓國都未必買得到，但而家去銅鑼灣就食到啦。用韓國紫菜包住加咗秘製麻油同芝麻調味嘅飯，同撈勻嘅GS25紅蟹膏，捲起後灑上芝麻就食得。一份有三條，賣相係就係麻麻地，但勝在蟹膏同麻油香味十足！
 

醬油蟹拌飯（$55/份）

即製醬油蟹拌飯亦係推介，白飯上面加牛油、醬油、麻油、芝麻、蔥、韓國紫菜，當然唔少得主角韓國醬油蟹，橙色嘅蟹膏令人睇到就開始流口水！而且醬油蟹會幫大家挑走唔食得嘅部分，食得更方便。食過想自己整嘅話，都可以考慮買返盒醬油蟹（$399/盒）返屋企。
 

韓式雜菜炒粉絲+韓式脆香炸雞粒套餐（$65/份）

講起韓國美食當然要數到炸雞啦，為咗方便大家即買即食，呢度嘅炸雞係Bite Size，加上甜辣醬同杏仁花生粉，香口惹味。而韓式雜菜炒粉絲材料豐富，粉絲又夠彈牙。
 

韓式醃漬海鮮及泡菜

鍾意下廚嘅朋友仔唔好錯過呢度嘅醃漬海鮮、包括韓式章魚醬泡菜（$43）、韓式蘿蔔泡菜（$45）等。比較特別嘅有粉紅色賣相嘅紅菜頭汁漬蘿蔔泡菜（$35），同微辣香脆嘅韓式香辣炸蟹仔（$38）。
 

日式足料玉子燒

明太子玉子燒（$68）

而日本小食代表就有呢個即製玉子燒，一份用咗足六隻日本雞蛋加鰹魚汁！而口味就有原味（$63）、火腿芝士、芝士粟米、三文魚碎、明太子同櫻花蝦（各$68）選擇，材料十足建議搵多兩個朋友仔開心Share。雖然略嫌過熟少咗啲蛋汁，不過鰹魚汁嘅微甜同雞蛋香配合得宜，味道補返數啦。
 

關東煮（$15/件，$42/3件，$65/5件）

其他推介

韓式豬手伴蔬菜（$250/份）（每日限量20份）

蒸炭燒排骨餃子（$28/5件）

豚谷牌原味豬手切片配扁鍋貼（$38/份）

崇光超市日韓美食節
活動日期：即日起至2018年4月10日（10:00-22:30）
地址：銅鑼灣軒尼詩道555號崇光百貨B2/F

文、相、片：Cathy