將鐵板燒同居酒屋溝埋一齊係咩玩法？咁就要問問銅鑼灣呢間餐廳喇。有傳統鐵板燒、有Omakase廚師發辦鐵板燒餐單，仲有駐場清酒師為客人挑選sake。

首先介紹下餐廳招牌菜：和牛漢堡扒。選用100%宮崎A5和牛，煎到外層微微焦但內裡嘅肉汁依然留住，肉質仲好嫩滑，入口即融。連埋主廚秘製嘅日式醬汁同太陽蛋上陣。

法塔紙包湯亦相當特別，用可以承受高溫嘅法塔紙包住啲湯料，咁個海鮮湯就可以直接喺鐵板上面煮喇。以日本空運到港嘅魚、蝦、大蜆等等煮成，加埋日本捲心菜、松茸、日本菇等，好鮮甜。

如果你喺正happy hour去，就可以嗌個happy hour set喇，包一杯日本生啤同五串串燒，開飯仔去嗰日就係燒冬菇、宮崎豚肉、青椒、赤雞肉同赤雞翼。

 宮崎妻地雞炭火燒

 青龍蝦

如果想要食Omakase鐵板燒，建議早些少卜位，咁就有機會坐到鐵板燒吧枱，望住師傅整嘢食喇~介紹下師傅先，主廚係嚟自東京嘅泊谷真樹san，入行超過25年，師承自曾喺東京八王子鐵板燒名店「大洋軒」掌廚嘅父親。

同場嘅仲有知名唎酒師，首位獲得呢個名銜嘅香港人，Randy Au，佢會駐場為客人挑選清酒。其中，廣島縣嘅「一代彌山」氣泡清酒係佢嘅特別推介，香港首發㗎。呢隻sake，有汽之餘，亦充滿住酵母同乾果香，餘韻仲好fresh下，配埋海鮮一流。另一隻「大黑正宗」純米吟釀，用咗隻新興酒米，飲落有好香嘅香蕉、蜜瓜、水晶梨、桃等果香味，建議可配串燒。

和幸創作鐵板料理
地址：灣仔摩理臣山道23號南洋酒店2樓

文、相：Kar