每逢糧尾都特別手緊，食餐晏仔都要精打細算，盡量食平啲啲。不過而家啲餐廳食個晏，閒閒地都要40幾50蚊！所以邊度有平價飯堂，打工仔必須要mark實！呢間主打泰式海南雞飯嘅餐廳，喺旺角、觀塘同新蒲崗都有分店，一個飯$36，飯量十足包食飽，絕對係糧尾救星。
泰式海南雞飯$36
雖然定價親民，但用料同製作一啲都唔馬虎。餐廳選用三黃雞製作泰式海南雞飯，先將原隻三黃雞放入加咗香茅、斑蘭葉同檸檬葉嘅湯水入面熬一個鐘；油飯用泰國香米，又會放入混入多種泰國香料，如乾葱、香茅等嘅雞湯內浸過。所以煲出嚟嘅油飯，香茅味重，雞肉亦嫩滑，點埋自家調製嘅醬汁，酸甜帶辣，係幾開胃。
泰式豬手飯$36
豬手飯都係$36，豬手用上超過15種香料，同埋泰國師傅自用逾4年嘅滷水膽炆焗3個鐘以上，相當入味，豬手口感軟腍。配埋自家炒嘅酸菜，可以解解油膩感。跟埋隻流心蛋冇得輸。
Grandma 咖喱牛腩飯$36
至於咖喱牛腩飯，牛腩軟腍入味，咖喱汁都係自家調製，辣就唔係好辣，椰香味好濃郁。原來係以超過8種香料製作，而且只係用椰汁，冇加水咁煮成！幾個飯嘅餸料都唔算話好多，以飯量搭夠。
芒果糯米飯 $18
好多人都鍾意食嘅芒果糯米飯，質素都唔錯，雙色糯米飯口感軟糯，椰香十足。
文、相、片：Kar