距離年初四仲有半年，但年初四嘅「面口」就應該周街都係。學生放完暑假要番學，打工仔要經歷無紅日嘅9月！為抑制呢股陰沉黑氣，開飯仔搜羅4間酒店最新下午茶自助餐情報，得閒搵下BFF吹水歎茶仲好啦～

勁搶眼鮮紅草莓塔 2+2 café

Buffet迷經常幫襯的2+2 café，喺9月起以韓食及草莓為新tea buffet主題，鹹點大多係韓國經典食品如冷麵、年糕、煎餅、泡菜湯等，至於甜品就有幾款草莓製成的甜品，最搶眼有就係草莓塔。而刺身壽司、冷熱盤等一樣會供應，性價比高。

經典韓式美食，有 (左) 韓式冰鎮冷麵。揀選梅子麵或蛋麵，再配以雞絲、泡菜、海帶及芝麻，再加埋檸檬、青檸、梅子或柚子味醬汁，味道酸酸好醒胃。而 (右) 韓式炒年糕，口感煙韌，仲好有辣勁。

草莓塔配白朱古力噴泉，好eye-catching，微酸清新嘅草莓加埋香甜幼滑的白朱古力，味道一流。

其他草莓甜品：(左) 即製草莓拿破崙、(右) 草莓撻

草莓蜜語．韓式下午茶自助餐
供應日期：2017 年 9 月 1 日起至另行通知
供應時間：星期六、日及公眾假期 3:15pm-5pm
價錢：成人 $258/位、小童 $138/位，另收加一

迎秋補身栗子餐 大堂酒廊

天氣咁熱，好難令人聯想到秋天，但事實上9月已經係入秋時間啦！九龍香格里拉酒店就以栗子入饌，炮製出煎乳鴿伴野菌及栗子沙律、栗子蘑菇餡餅、栗子巴黎圈等菜式，栗子本身味道香甜，鹹甜都咁啱食架！

另有切肉櫃枱、4.3北海道牛乳雪糕以及糖果角，質素可拍得住自助晚餐。

香甜栗子主題下午茶自助餐
供應日期：2017 年 9 月起
供應時間：星期六、日及公眾假期
價錢：成人 $338/位、小童 $268/位

任食日本白桃鹹甜點 咖啡亭

以日本山梨縣入饌，炮製出意大利香腸芝士白桃薄餅、漬醃白桃海鮮杯、烤白桃沙律、白桃芝士迷你卷蛋、金箔白桃果凍、白桃忌廉蛋糕等16款鹹甜點。另外亦有翡翠螺、青口、刺身及壽司等必食海鮮、即叫即製嘅意大利麵、粥品及班戟添！

(左) 白桃日式咖喱配吉列豬扒，將白桃加入咖喱汁入面，減輕濃濃嘅咖喱味道，食落更fresh；(右) 意大利香腸芝士白桃薄餅，將白桃放入pizza一齊焗，白桃朕味好強勁。

用香甜白桃製作嘅甜品，肯定夠甜夠juicy：(左) 白桃芝士迷你蛋卷；(右) 白桃忌廉蛋糕。

日本白桃の戀下午茶自助餐
供應日期：即日起至 9 月 30 日
供應時間：星期一至五 3pm-4:30pm、星期六、日及公眾假期 3:15pm-5pm
價錢：星期一至五 成人 $288/位、小童及長者 $188/位；星期六、日及公眾假期 成人 $248/位、小童及長者 $188/位，另收加一

「醉」歎下午茶 樂聚廊

香港港麗酒店同Absolut vodka合作，以經典cocktails做靈感推出限定下午茶自助餐。食物有成廿幾款，好多選擇。鹹食有煙肉洋蔥撻、蟹餅、鴨肝凍批、炭烤雞肉香草包等，好飽肚；至於甜品有閃電炮芙、macaron、迷你香梨撻等；仲有酒店主廚以5款Absolut flavoured vodka系列而炮製嘅夏日特飲。

每位可免費獲得mini版Absolut vodka 1枝，好似酒版咁細支，好cute。不過要注意，星期六、日先有tea buffet供應，星期一至五則供應3層架下午茶。

彩色仲夏下午茶
供應日期：即日起至 9 月 30 日
供應時間：3pm-5:30pm
價錢：$298/位、$498/2 位，每位包熱茶、咖啡或 Absolut 夏日特飲 1 杯

$138 抵食大阪tea buffet 儷廊咖啡室

價錢仲包埋加一，咁抵食？酒店以日本大阪做最新tea buffet主題，到底有乜食呢？壽司刺身、青口、京都冷麵、幾款熱盤、芝士餅、朱古力噴泉、雪糕、豆腐花等超過40款食物供應，仲有即叫即煮嘅牛肉野菜麵檔添！除此之外，tea buffet仲有3款特飲：和歌山柑橘梳打、福岡蜜瓜特飲及富士蘋果蘆薈特飲。選擇都幾多，加上價錢咁吸引，值得一試。

凍海鮮選擇不多，有蝦、青口。

餐廳亦設少許熱盤，有咖喱、炒排骨、炸魚餅、海鮮炒西蘭花等。

甜品方面有朱古力噴泉、蛋糕、芝士餅、雪糕、豆腐花、中式糖水等。

「法善寺橫丁」下午茶自助餐
供應日期：即日起至10月尾
供應時間：逢星期六、日及公眾假期 3:15pm-5:30pm
價錢：成人$138/位、小童$98/位，已包加一

文：Joy