隨住越嚟越多香港人鍾意食日式燒牛舌，近年唔單止燒肉店會供應牛舌，更有牛舌專門店開張！今次開飯仔就參考咗網上牛舌關注組成員嘅推介，搵咗本地其中四間有最多好評嘅燒牛舌餐廳，牛舌控可以加入To-go List呀。
 

目錄

必食原條牛舌芯 野郎Stone

藏身於北角一間超市Food Court當中嘅石板燒牛扒店，唔少關注組組員都大力推薦佢哋嘅原條牛舌芯！叫得做牛舌芯，即係牛舌中最軟嫩嘅部分，每條牛舌只有兩至三成可以被稱為牛舌芯咋。原條嘅好處係夠厚切，入口爽脆多汁，有嚼勁而唔韌。懶得自己切可以請店員碎上，配乾蒜片一流啊。

原條牛舌芯（$148，套餐+$30）（圖: michmoment、fattyfatttyy）

抵食午市套餐 Hungry Monkey 

呢間日式鐵板燒餐廳夜晚都有得食牛舌，不過最多組員推介嘅係午市套餐當中嘅厚燒牛舌，皆因價錢相宜又食到即燒鐵板牛舌！師傅火候控制得宜，厚切牛舌外焦內嫩，裡面肉質粉嫩、Q彈爽口。銅鑼灣店亦有牛舌薄燒選擇，而套餐包埋炒飯、沙律、湯等，男士食都會夠飽。

厚燒牛舌（午市套餐，荃灣店$98，銅鑼灣店$128）（圖: laiyiqi1991）

松露/芫荽蒜蓉醬加分 燒肉 JuJu

旺角呢間今年年初新開嘅一人燒肉店好快就有組員推介，雖然得薄牛舌，不過勝在有辣椒蒜蓉、洋蔥蒜蓉、芫荽蒜蓉、松露蒜蓉醬四款選擇，唔係Gimmick咁簡單，四款蒜蓉醬都真係有增香提鮮嘅效果，牛舌口感亦相當爽脆。定食更包埋白飯、味噌湯、泡菜或日式沙律，一人獨食得，同朋友叫埋其他燒肉一齊開心Share亦得。

牛舌定食（$68/150g，$108/300g）（圖: rita_a）

分量十足厚燒牛舌飯 順日本料理

天后呢間小店可以話係關注組組員發掘到嘅Hidden Gem之一，門面低調，不過佢哋嘅厚燒牛舌飯賣相就相當浮誇！五大塊厚切牛舌，每塊都約有2cm厚，舖完真係見唔到啲飯。佢哋嘅牛舌口感偏腍，不過依然有咬口，而且非常多汁。唯二希望餐廳改善嘅，一係牛舌調味有時太鹹，二係人手不足有時要等耐啲，可以改埋就好喇。

厚燒牛舌飯（午市$118，晚市$128）（圖: _eatateeaten_hk_）

文：Cathy.H