為期五日嘅青衣戲棚2018今日起正式開鑼，除咗可欣賞粵劇外，吸引到各位來到青衣戲棚嘅當然係嘅各個美食攤檔，今年更有不少新穎小食、飲品添，預備來青衣戲棚逛下嘅各位要注意喇！

今年青衣戲棚陣容鼎盛，單是小食攤檔就有近80檔，款式繁多，肯定有款啱你心水！開飯仔精選咗12間好味檔口，睇下有乜啱你心水啦！

柴犬糰子、「心」信玄餅

攤位：58

要數全場最可愛嘅小食，一定係呢個柴犬月見糰子串($20/串)，以人手即場用糯米粉搓成柴犬狀，再用芝麻粒執番柴犬樣子，就造成好cute嘅柴犬月見糰子串。沾少許日本黑糖汁、黃豆粉味道更佳。

名為雨滴蛋糕嘅甜品晶瑩剔透，好似水信玄餅，不過攤檔做成心形，並以法國天然果露糖漿Monin調成不同顏色，蛋糕入面有鹽漬八重櫻櫻花、桂花碎、食用金箔等配料。$40/份，旁邊仲有日本黑糖汁、黃金粉，食完幾透心涼。

消費滿$60即可免費獲贈ONE PIECE扇仔一把。

即炒鹹蛋黃爆谷、菠蘿王子

Holy Hungry　攤位：56

鹹蛋黃熱潮繼續發熱發亮，攤檔主打鹹蛋黃小食，每款均為$30/份。款款個名仲好盞鬼添，好似金雞獨立（雞翼）、黃金戰士（魷魚圈）、金條（薯條），而最教途人停下腳步嘅當然係即叫即炒嘅爆菊王（爆谷），喺客人面前即席生炒粟米，並烘焗成爆谷，再加埋自己磨碎嘅台灣鹹蛋黃，好香，好鬆脆。

至於同樣添加咗鹹蛋黃嘅（左）金雞獨立、（右）黃金戰士亦好出色，鹹蛋黃醬汁更容易沾上雞翼及魷魚圈，食起來鹹香味更濃。

飲品方面，開飯仔推介視覺效果一流嘅菠蘿王子($50)，採用甜度達6%嘅原個菲律賓DOLE菠蘿，首先抽出菠蘿肉，令原個菠蘿成為特色飲品杯，再加入冰粒及雪碧，將菠蘿掛喺菠蘿杯外圍，最後加入會噴煙嘅乾冰，完成！

必like海鮮兼一口牛粒

裕田　攤位：61

去得呢類美食攤位，總會遇到海鮮檔，但每次經過都依然想食，好似呢款秘製蜜糖串燒金蠔($40)，喺好有「蠔」香嘅金蠔上搽上蜜糖等調味，yummy！

另外仲有同樣吸引嘅（左）烤珍寶帶子及（右）香煎一口牛，一串兩件嘅帶子size好大，攤檔用上日本珍寶帶子，食落好有口感；而香煎一口牛同樣都用日本貨，充滿油香又夠juicy。價錢均為單售 $/40份。

無糖台式冷泡茶

哈哈燒　攤位：57

由警訊之花馬溱禧有份投資嘅攤檔，除咗有黑松露牛柳粒、，仲有一袋袋粗口台式冷泡茶，4個字道盡香港人嘅心聲，又幾盞鬼喎！冷泡茶設水蜜桃、桂花、茉莉及荔枝4款口味。

炒蜆三味

盡蜆功架　攤位：55　

超級鮮甜嘅炒蜆，係人都想食。呢檔更加係賣大包，唔用細細粒嘅細蜆仔，而係用體積較大嘅沙白，好鮮甜，蜆肉亦好爽口，而且無乜沙，好味！炒蜆分清酒、辣酒及蒜蓉3款口味，價錢為$40-$50/份。

彩虹麻糬可麗餅、超長薯條

攤位：70-71

七彩繽紛嘅彩虹麻糬可麗餅($58)，即叫即捲，材料多多，有自家製麻糬、棉花糖粒粒、忌廉、果乾粒等等，另外客人可自選果醬，有士多啤梨、芒果、朱古力、黑糖4款選擇。

另有超長薯條($58)，同樣即叫即炸，一收到客人柯打就喺炸爐上唧出薯條，隨即炸至脆身，然後揀選心水醬汁就食得，有芫荽、蜜糖芥末、芝士、泰式辣醬、茄汁等6款口味，最後灑上紫菜碎裝飾。呢款芫荽味薯條，各位芫荽迷一定要試。

豬腸麵線

台灣正宗麵線　攤位：30

堪稱台灣名物之一嘅豬腸麵線($30/碗)，喺青衣戲棚都食到，正！一碗入面有8件豬大腸，肥厚得嚟又夠乾淨，而麵線惹味兼滑溜，分量細細哋，食落不太heavy。另可搭配烏醋、辣椒醬或蒜醬，更加滋味。

黃金雞皮、炸軟殼蟹

真美香　攤位：66

相信各位都食過不少鹹蛋黃系列嘅小食，而呢款鹹蛋黃牛油雞皮($40/份)又幾特別喎！先將雞皮炸得香脆，另外將牛油、鹹蛋黃炒成醬汁，再倒入雞皮，令雞皮沾滿鹹蛋黃醬汁，簡單又好味。

而另一款酥炸軟殼蟹($40/隻)，雖然無鹹蛋黃加持，但炸到脆卜卜嘅軟殼蟹內裏依然好soft、好juicy，值得一試。

獨角獸水泡梳打　

Mini Jobs 攤位：70

還記得呢個的的骰骰嘅小水泡梳打嗎？臨近夏天，各個小水泡又係時候出場！攤檔以水泡+梳打一set咁賣，水泡有獨角獸、小紅鶴、蛇、菠蘿4款，而梳打口味則有草莓、菠蘿、白桃、荔枝、檸檬、熱情果、青蘋果及巨峰提子8款選擇。價錢為$38至$44等。

太極熱狗

太極黑白配　攤位：50

各位，呢個唔係普通嘅熱狗，而係用中式油炸鬼做成嘅太極熱狗($50/份)，入面有德國香腸、蛋黃醬等，重點係有一唧就聞到嘅黑松露、白松露，香氣十足，正呀！

食到見口乾，仲可以加錢要埋呢個100%天然嘅拉環椰皇($35/個)，輕輕一啪就飲得，既方便又解渴。

首推炸粟米墨魚餅

白鬚印尼牛丸　攤位：53

主打印尼牛丸嘅白鬚除咗繼續供應牛丸、牛骨湯及千層糕外，今次喺青衣戲棚首推炸粟米墨魚餅($55)，即炸嘅墨魚餅好香口，最正嘅係以乾蔥頭、青辣椒、紅辣椒、蔥等配料製成嘅秘製Sambal Matah辣椒醬，好有辣勁，啱晒嗜辣之人！

13款糯米糍選擇

香港糯米糍　攤位：78

攤檔售賣嘅糯米糍有成13款咁多，除咗芒果糯米糍($18/個)經典口味，仲有貓山王味($25/個)以及今年新增設嘅阿華田味($15/個)。即使掃街掃到飽，都可以買走糯米糍歸家慢慢歎。

往年嘅青衣戲棚完結，剩下嘅竹籤、膠盒等即棄垃圾非常多，仲形成垃圾山發出惡臭添！今年多個攤檔已簽署《綠色約章》，絕對歡迎各位自備餐盒、餐具，支持環保架！

《真君大帝寶誕》青衣戲棚2018
活動日期︰2018年4月27日至5月1日
活動時間︰2pm-11pm
地址：青衣青綠街38號青衣體育會球場 
交通：乘搭至青衣地鐵站再轉249M，第1個站落車

文：Joy