七月盛夏，有「韓」風襲港，為銅鑼灣地區帶嚟一股打卡奶昔潮流！講緊嘅係韓國人氣奶昔品牌PERFECT‧ICE呀，4年前喺首爾夜貓子夜巿度打出名堂，最高峰試過日賣1000支！而家喺韓國同馬來西亞夾埋有成49間分店，香港呢間，係第50間啦！

舖頭主打奶昔同雪糕，兩者都係以日本牛奶製作，其他食材則嚟自韓國、意大利同法國，製作過程中絕對冇加冰同水，所以可以飲到濃郁嘅奶香。開業初期，暫時menu都會同韓國一樣，有11款奶昔同埋雲呢嗱味軟雪糕選擇。每杯奶昔仲會連埋個反光保冷袋畀你裝住拎走，就算邊行邊飲，都唔怕太快就畀太陽曬溶，依然保持到冰感啊！

11款奶昔中，最推介就係薄荷朱古力味喇，一嚟薄荷綠好靚仔啦，二嚟飲落陣陣冰涼感喺喉嚨度透心涼返出嚟，解暑一流！

想飲得健康啲嘅有包含咗15種穀物嘅暗黑風暴，奶香之餘芝麻味亦頗突出，仲有粒粒cereal咬下口咁，幾有口感。

士多啤梨味奶昔帶有水果甜香同奶香，細心嘅朋友仲可以發現到粒粒士多啤梨籽㗎。

至於紐約芝士蛋糕味呢感覺就比較thick，杰身啲有返啲份量。其餘口味包括原味、綠茶、韓式紅茶、黑朱古力、藍莓、曲奇雲呢嗱同咖啡味。

軟雪糕暫時就淨係得原味，即係雲呢嗱味供應，白白滑滑，口感較一般軟雪糕硬身，而且唔算太甜，不過溶得好快，要打卡就快快手手咯。店方表示試業期過後，會陸續加啲新口味或者香港限定味喎。

重要的事最後說：由即日起至7月14號，佢哋會喺銅鑼灣區內快閃派發空樽同埋贈飲券，拎咗後去新店，就可以免費獲贈原味奶昔一支！

PERFECT‧ICE
地址：銅鑼灣謝斐道518-520號地下A舖

文、相、片：Kar