好多人去韓國嘅時候都會特意去食韓式多士，而家唔使恨啦，因為嚟自韓國嘅SSOJA TOAST ＆ HOTDOG正式登陸香港！SSOJA TOAST & HOTDOG係一間主打韓式多士三文治及熱狗嘅連鎖店，喺韓國已經有足足130間分店，餐廳對食材要求嚴格，所有肉類同蔬菜都經過嚴選。香港分店除咗供應招牌多士同熱狗外，都會有埋炸雞、Latte同乳酪飲品賣！

所有多士都會加上兩款秘製醬汁，每片多士都用牛油稍為煎香～醬汁包括用金奇異果製成嘅SSOJA1醬，味道甜甜地，有少少似杰身嘅沙律醬。而另一款就係蜜糖芥末醬，不過就無咁辣。

韓式漢堡扒拉絲多士($48)

香港店同韓國一樣，所有食物都係即叫即做。招牌韓式漢堡扒拉絲多士，啱晒鍾意芝士嘅朋友同食肉獸～漢堡扒由韓國直送，以牛肉及豬肉製成，肉味都幾重。另外加上大量車打芝士同秘製韓式醬汁，味道豐富，加返新鮮蔬菜成件事就無咁漏啦～

韓式多士三重奏($38)

另一招牌就係呢個韓式多士三重奏，參巧英式All Day Breakfast，餡料有雞蛋、火腿扒同煙肉，火腿扒好厚身，煙肉仲煎到卜卜脆！

韓式奄列薯餅多士($33)

薯餅加奄列呢個配搭又幾新鮮，薯餅炸得香脆，連同鬆脆嘅多士食就有雙重口感啦！

招牌熱狗($28)

韓國直送豬肉熱狗腸，配自家製BBQ醬同辣醬，前者比起美式BBQ醬煙熏味無咁重，而辣醬偏辣，好惹味！

韓式炸雞(大$65/細$48)

香港限定嘅韓式炸雞，分原味、芝士味同燒烤味，炸雞熱辣辣有肉汁，仲配有炸年糕，外面脆口內層煙韌～

紫薯藍莓拿鐵(熱$33/冷$36)、香蕉芒果雪酪($42)

有嘢食又點可以無嘢飲，紫薯藍莓拿鐵有淡淡紫薯味，藍莓味就啖咗少少。而香蕉芒果雪酪都係香蕉味較重，有少少似細細個食鳳仙雪條嗰個味～

Ssoja Toast & Hotdog  

地址: 佐敦彌敦道380號逸東酒店LG樓Food Hall B9及B10號舖

文、相、片: Yanica