話香港係一個美食之都絕對無錯，2月中就會有餐飲集團再次舉辦餐廳週，屆時大家就可以到旗下餐廳，以優惠價享受多國美食！當中包括今年啱啱得到米芝蓮一星肯定嘅旁遮普菜館，「亞洲50大最佳餐廳」之一嘅法國菜館等，部分仲係平時不設訂坐嘅人氣餐廳！
 

Black Sheep Restaurants將於2月18號至24號期間，一連七日再度舉辦「黑羊 ‧ 美饌」餐廳週，食客可以喺2月4號開始上活動網站，以優惠價預定旗下共17間餐廳嘅精選午市或晚市套餐。
 

精選餐廳推介

米芝蓮新晉一星旁遮普菜　New Punjab Club

晚市套餐（$398/位）

唔單止係2019米芝蓮新上榜一星餐廳，更加係全球首間得到米芝蓮一星嘅旁遮普菜館！咁但係旁遮普菜即係咩？簡單嚟講係揉合咗印度同巴基斯坦菜嘅特色，特別以地道泥窟燒烤菜為主。餐廳裡面仲展示咗唔少當代藝術畫作，頗有特色。
 

免治羊肉包

最令人眼前一亮嘅菜式就係呢份免治羊肉包，免治羊肉用羊肉加香料熬煮五至六個鐘至完全入味，上面再加脆薯增加口感。用外酥內軟又富牛油香嘅甜餐包夾住嚟食，香口惹味。
 

泥窟烤芝士

牛油印度薄餅

窟燒烤爐係源自印度北部同巴基斯坦東部旁遮普地區嘅傳統，而泥窟烤芝士就用泥窟燒新鮮芝士，配以粟米酸乳酪同紅菜頭青瓜沙律，芝士口感特別。另外牛油印度薄餅配菠菜蘑菇青豆咖哩亦相當有印度特色。
 

意大利式海鮮美食　Osteria Marzia

晚市套餐（$428/位）

呢間主打意大利沿海地區美食，餐廳主廚Luca Marinelli曾經就職於歐洲多間米芝蓮星級餐廳，菜式選用時令食材同海鮮，亦供應自家製意粉。餐廳裝修亦以時尚風格為主，加入海洋元素。
 

油甘魚

嚟到當然要試海鮮菜式，呢道前菜以番茄酸味帶起胃口，油甘魚口感滑嫩，再加上橄欖同羅勒嘅香味，色香味俱全。
 

波士頓龍蝦結他意粉

意式海鮮煮鱸魚

自家製意粉比較粗身，口感彈牙有嚼勁，掛上充滿波士頓龍蝦鮮甜香味嘅醬汁更加美味。而意式海鮮煮鱸魚加咗蜆、橄欖同車厘茄，魚肉滑溜結實，味道清新。
 

 
星級新派法國菜　Belon

（左）原隻烤走地雞配法式青豆（晚市套餐 $588/位）

佔據2018年「亞洲50大最佳餐廳」第40位，兼係2019米芝蓮新上榜一星餐廳，Soho區呢間新派法國餐廳亦係今次餐廳週嘅亮點之一。晚市套餐雖然唔算平，但可以試齊惠比壽生蠔他他、原隻烤走地雞配法式青豆、拿破崙蛋糕等招牌菜。加上餐廳環境自然簡約，具法式優雅氣息，絕對值得一試。
 

抵食泰國地方菜　Soul Food Thai

午市套餐（$98）

最平嘅係Soho呢間泰國菜館，主打當地唔同地區嘅特色菜，Lunch唔洗$100就可以試到四道菜同甜品，絕對抵食！
 

「黑羊 ‧ 美饌」餐廳週
活動日期：2019年2月18日至24日
完整參與餐廳名單及網上訂座： www.blacksheeprestaurants.com/black-series（2月4日11:00起）
^必須網上訂座

文、相、片：Cathy