呢個主打60秒萃取新鮮茶湯嘅品牌最近去到旺角新商場開分店，首設花草茶吧，畀大家邊聞香邊調校出屬於自己口味嘅台灣茶。加上乾花牆非常搶眼，無論係Tea Lover定Foodie都啱嚟飲杯茶打個卡！
 

COMEBUYTEA位於旺角T.O.P地下嘅新店首設COMEBUYTEA GARDEN茶酚花園，即係創意功夫茶吧，聽到功夫茶以為好老土？裝修同Menu會令你眼前一亮，乾花牆唔單止係裝飾，亦係代表喺茶當中加入精選芳草植物同天然果乾增添香味。暫時共6款Tea Infusion可以選擇。Menu上列明口味配搭同建議享用時間。
 

賞茶步驟

1. 聞沖泡前嘅茶葉、香草同果乾香

 
2. 沖泡3-5分鐘充分釋放味道

 
3. 用聞香杯再聞茶湯香味

4. 倒落細杯試飲原味

 
5. 按自己口味再添加香草、果乾同糖

 
茶飲推介

 觀音夢露（$36）

呢壺觀音夢露係用咗台灣鐵觀音，加上水蜜桃等綜合果乾，同檸檬馬鞭草。聞起嚟檸檬馬鞭草嘅清新草本香氣比較濃，有種清新輕靈嘅感覺，飲落亦唔會好似薄荷茶咁有苦味。而果乾同新鮮水果嘅風味亦有唔同，水蜜桃乾保留甜香之餘，仲多咗一種有啲似忌廉咁嘅奶香，估唔到又幾夾。

而鐵觀音喉韻比較重，餘韻介於烏龍跟紅茶之間，香氣令人感覺溫暖。建議唔洗加哂所有果乾，令茶湯保留鐵觀音茶嘅餘韻。自己倒入香草同果乾後記得要搞勻，令你嘅第二、第三杯都有唔同風味，就好似功夫茶嘅第二、第三泡咁！甜美、有韻味而帶輕盈感，所以就以被風吹起裙邊嘅性感女神瑪麗蓮夢露為名啦。
 

 
阿里山戴安娜（$38）

而呢壺適合下晝享用嘅阿里山戴安娜就用阿里山高山烏龍，搭配土芭樂乾同芳香萬壽菊，芳香萬壽菊沖泡前只有草本香，但沖茶後帶少少柑橘果香。而芭樂即係番石榴，造成果乾後保留清新香味，有啲似青蘋果。
 

高山烏龍茶本來就有種特別嘅輕靈，加上清新果香後令後韻回甘更討喜。而且果乾可以就咁食，天然果甜可以突出茶甘。優雅而平易近人嘅感覺，以戴安娜王妃嚟比喻都幾貼切。
 

 鳳梨茉莉綠茶（$28）（暫只提供外賣杯裝）

當然，如果大家無時間坐低慢慢嘆茶，買杯手搖茶邊行邊飲都絕對無問題。呢杯係品牌嘅夏日推介，100%純鳳梨汁仲飲到少少鳳梨果肉，香甜爽口。而茉莉綠茶味道清雅芬芳，幫大家驅走夏日悶熱。

旺角新店同其他分店一樣，唔會預泡茶湯，每一杯都用製萃茶機以五段式萃取，60秒就有一杯新鮮茶湯。而且每間分店都有受過專業訓練嘅調茶師，以Mocktail方式用專業手搖杯調茶，令茶湯均勻接觸空氣，茶香更柔和，唔會飲到澀味，口感亦會加倍順滑。
 

COMEBUYTEA
旺角彌敦道700號T.O.P This is Our Place G03號舖

文、相、片：Cathy