港式蛋撻一向討論度都好高，有曲奇皮派同酥皮派，發展到而家都愈來愈多新口味同創意版本，今期一次過介紹晒畀大家！

目錄

酥皮系列：

極厚酥皮 祥興咖啡室

圖: JoelleMan

跑馬地老字號茶餐廳，新鮮出爐蛋撻日賣300個。佢嘅蛋撻酥皮特別厚亦都特別鬆脆，就算擺耐咗一都樣咁脆呀，蛋漿厚實得嚟香濃軟滑。溫提大約3點就會賣晒，想食要襯早。

脹卜卜多層酥皮 金園茶餐廳

圖: KAREN KNG

長期都有人喺門口排隊等嘅酥皮蛋撻～咬落去好酥脆，一層層酥喺口入面化開，牛油味同蛋香味都突出。脹卜卜嘅外形加上比一般蛋撻大，食落更滿足，價錢又貼地，難怪咁受歡迎。

日賣千個 新華茶餐廳

圖: WingMi8700

另一間同樣位於長沙灣，經常畀人用嚟同金園茶餐廳比較嘅茶記。日賣千個蛋撻，酥皮摺數多，蛋漿香滑且濃郁，同撻皮嘅比例啱啱好，必食！

368層酥皮 酥妃皇后

圖: big_stomach

呢間高級西餅店以酥皮蛋撻作主打，堅持每日純人手製造368層酥皮，酥皮好似紙片咁薄，一咬係脆到會食到成身都係㗎，而且一啲唔油膩添～

曲奇皮系列：

人氣街坊小店 康甜餅店

圖: kteats

北角一間街坊麵包小店，曲奇皮蛋撻每次少量生產，一出爐就好快畀人買晒㗎喇～曲奇皮鬆脆，蛋漿嫩滑甜度適中。

關注組大推 海濱美食

圖: terrylkc

畀香港蛋撻關注組大推嘅荃灣隱世小店，位置比較隱蔽，蛋撻出爐時間都無定，有緣先食到，但仍然無阻大家去搵好嘢食嘅熱情。撻皮非常鬆脆，牛油香重，帶有少少鹹味，配埋香甜嘅蛋漿真係冇得輸。

滿滿蛋漿 超羣麵包西餅 

圖: andyfigo

呢間餅店足足有50年歷史㗎喇，佢嘅曲奇皮蛋撻特別在於較一般嘅蛋撻高身，蛋漿亦比坊間嘅多，所以一入口係滿滿嫩滑濃厚嘅蛋漿！

創意蛋撻系列：

流心焦糖蛋撻 大安茶冰廳

圖: andymyf

一間融合咗懷舊茶餐廳同新式Cafe元素嘅餐廳，流心焦糖蛋撻酥皮極鬆脆，蛋撻內嘅焦糖微微流心但又唔會過甜，配埋濃郁嘅蛋香又多一份層次，出色～

手工鳳梨酥麻糬蛋撻 臺北棧

圖: 花生mama

鍾意台灣嘢嘅朋友一定要試下呢個手工鳳梨酥麻糬蛋撻，一件撻有齊撻皮嘅鬆脆、麻糬嘅煙韌及蛋漿嘅嫩滑，無論口感定味道都好豐富呀，熱辣辣食真係好好食。

招牌布甸蛋撻 星味坊烘焙專門店

圖: helenhelenleung

招牌布甸蛋撻比一般蛋撻厚身，蛋漿特別多，口感嫩滑而且比一般蛋撻重奶香味。另外仲有巴斯克芝士撻，芝士撻綿密得嚟順滑，芝士味同焦香味平衡得好好，芝士控必試！

文: Yanica