台式手抓餅外皮香脆帶麵粉香，餡料亦千變萬化，唔同配搭都令人驚喜。喺香港都有唔少小食店同餐廳主打手抓餅，今期介紹4間畀大家，有人氣手抓餅專門店、超過40款口味嘅小店等～

超過40款口味+紫薯餅皮 艾·蜜思手抓餅

西灣河太安樓其中一間人氣小食店！呢間小店就主打台式手抓餅，最特別係佢哋有普通餅皮同紫薯餅皮，兩者都做到好香脆，但紫薯味更有驚喜，因為真係有好香。餡料方面更超過40款，推介邪惡嘅芝士雞蛋午餐肉、蘑菇美國肥牛、芝士火腿粟米蟹籽沙律等。或者鍾意自由配搭自己鍾意嘅配料都得，份份都好足料㗎。

圖: bageladdiction

葵廣超人氣 慧食貓

葵廣長期人氣高企嘅小食店，最近去埋旺角開分店，而家唔使特登走入葵廣都有得食啦！火腿雞蛋肉鬆、蟹籽吞拿魚及火腿雞蛋芝士豬柳等都好受歡迎，拎上手熱辣辣，餅皮仲係好脆，而且份量一樣唔會手軟，每一份都會加入生菜，咁食落就無咁易膩啦～價錢方面廿幾蚊就有一份，今時今日嚟講真係好抵食！

圖: yungfoodietwins

蔥花玉子燒手抓餅 德懿屋

土瓜灣區一間新開無耐、主打台式手抓餅、台式小食同港式小食嘅小食店。而佢嘅手抓餅口味都好有特色，如蔥花玉子燒手抓餅，手抓餅入面包住成寸厚嘅玉子燒，玉子好滑溜而且蔥花味香而不嗆，好香濃仲好飽肚～古早風味手抓餅，餡料有肉鬆、芋泥同煉奶，味道香甜芋泥味濃郁，鍾意鹹鹹甜甜嘅朋友唔好錯過！另外仲有泡菜玉子燒、粟米玉子燒及爆荽玉子燒等口味添！

圖: JeffTCN

流心麻糬芋泥雞蛋手工手抓餅 勝面

來自台灣的手工麵店，不過佢嘅手抓餅一樣咁受歡迎。流心麻糬芋泥雞蛋手工手抓餅，香脆嘅煎餅、軟糯又煙韌嘅麻糬同軟滑嘅芋泥，一入口有三重口感，味道方面三者都好配合，難怪咁受歡迎！唔係太好甜嘅，都有芝士肉鬆雞蛋口味，同時食到手工餅皮嘅蛋香同麵筋香，同樣出色～

圖: bobochow_

文: Yanica