甜品控留意！今期搜羅咗4間人氣嘅泡芙畀大家，好似法式焦糖燉蛋泡芙、芝麻湯圓泡芙、泡芙布甸包同開心果修女泡芙等，聽到都覺得好吸引～

法式焦糖燉蛋泡芙 Owl's Choux

圖：tamchristiana

主打Gelato同雪糕泡芙嘅日式甜品店，曾連續多年獲得米芝蓮街頭小食推介！法式焦糖燉蛋泡芙嘅外皮係菠蘿包脆皮，焦糖燉蛋味道焦香濃郁，內餡嘅奶油帶有一點鹹味，令成個甜品層次更豐富。提拉米蘇泡芙上層係鹹鹹甜甜嘅忌廉芝士，咖啡同酒味都啱啱好，味道唔太甜。另外仲有其他口味如日式焙茶、朱古力伯爵茶、檸檬乳酪等。

芝麻湯圓泡芙+台式芋泥鹹蛋肉鬆麻糬泡芙 AW Patisserie

圖：treasurefoodie

一間好有人氣嘅泡芙網店，最近喺尖沙咀開咗pop-up𠻹～店主曾經於法國巴黎藍帶廚藝學校學習，以法式手法將港式味道融入甜品中，仲有好多特別嘅味道㗎。芝麻湯圓泡芙將香濃嘅黑芝麻醬加上煙韌麻糬，黑芝麻味道好香濃。台式芋泥鹹蛋肉鬆麻糬泡芙面頭鋪滿鹹蛋醬同肉鬆，內餡就用上芋泥同麻糬，鹹鹹甜甜又幾夾。腐竹薏米泡芙都好特別，入口散發陣陣腐竹同豆味，加上用薏米做餡料更有咬口。

泡芙布甸包 嘉多娜餅屋/嘉多利餅屋/加多娜天然酵母手作麵包店

圖：so_good

呢間因為布甸麵包而聞名嘅餅店，相信大家都唔陌生啦～原來佢哋除咗普通布甸麵包，仲有泡芙布甸包，外皮脆卜卜，內餡好足料，有流心效果同埋非常幼滑，帶少少雲呢拿香味又唔會太甜。另外開心果脆脆泡芙，內餡係開心果蛋漿，面層再灑上開心果脆脆，開心果控必食。

開心果修女泡芙 YOI Coffee & Bakery

圖：bellyfoodiepig

九龍城一間人氣咖啡店，開心果修女泡芙係佢哋嘅招牌甜品。首先賣相已經啱晒相機食先，下層一粒大泡芙，上層再放一粒細嘅，中間唧上奶油好似雪人咁。下層內餡係滿滿嘅開心果奶油，開心果味好香濃，而上層就係吉士醬，外脆內幼滑，值得encore！

文：Yanica
編：Cathy