香港食泰國菜選擇好多，不過近年就愈來愈興新派泰菜，好味得嚟又令人驚喜，一齊睇吓邊間啱心水！
超人氣長龍店 泰排檔
圖：esfoodse
日日都大排長龍嘅小店，大廚係米芝蓮泰菜Samsen出身，難怪唔少人對佢有期待啦～以平實又地道嘅泰國街頭風味著稱，連價錢都好經濟實惠呀。必試嘅招牌菜式包括虎蝦醉貓炒河同和牛船麵，前者結合咗泰式香料同香港熟悉嘅河粉，特別一提河粉真係煙韌得嚟又夠滑，好出色！炒河粉吸收咗濃郁嘅醬汁同香料，香辣開胃，仲帶有獨特酒香，令味道更加立體，虎蝦都好爽彈。和牛船麵將高質嘅和牛融入傳統泰國船麵嘅湯底，湯底以牛骨、香料同草藥熬製而成，濃郁芳香，和牛入口即化，帶出滿滿嘅牛肉鮮香。另外仲有泰式蠔餅同飛天通菜都值得試㗎。
高質泰西fusion菜 Foodhall by Moon Thai 
圖：高質嘅泰西fusion菜，裝修結合咗泰國地道風味同時尚風格，帶嚟輕鬆又富異國情調嘅用餐體驗。招牌菜式包括和牛船麵，湯底以濃郁嘅香料熬煮，入口辛辣香濃，完美配搭入口即化嘅和牛，牛肉鮮嫩且充滿肉香；蟹肉炒飯則加入大量鮮甜蟹肉，炒得粒粒分明，香氣四溢，令人一試難忘。沙嗲羊肉串燒亦係人氣之選，羊肉經過泰式沙嗲醬醃製後烤製，肉質軟嫩多汁，沙嗲味濃郁且帶有微微辛辣。飲品就推介泰式髒髒奶茶，茶味濃得嚟帶點甜，而且仲好香滑𠻹。
米芝蓮推介泰國菜 Restoran SAYA
圖：連續兩年獲米芝蓮必比登推介嘅泰國菜館，主打味道更強烈嘅泰北菜～必試菜式包括泰北咖喱金麵，湯底濃厚香辣，金黃色嘅湯汁帶有椰漿嘅順滑同香料嘅濃郁，麵條煙韌彈牙，雞肉經過炭燒非常香，令人食過返尋味。泰式荔枝紅咖喱燒鴨係餐廳嘅另一亮點，以香甜嘅荔枝同濃郁嘅紅咖喱搭配，燒鴨外皮香脆，肉質鮮嫩，咖喱微辣帶甜，成個味道層次非常豐富，十分開胃。泰式炭火鹽燒魚用上鮮魚經過鹽醃製後炭火慢烤，魚皮香脆，魚肉鮮嫩多汁，配上特製醬汁食用，完美呈現出泰式燒烤嘅獨特風味。
西環異國風味泰菜 泰誇張
圖：呢間泰菜小店設計色彩鮮豔，好似一間異國風cafe咁，一踏入即感受到濃厚嘅異國情調。泰式酸辣清湯用大量香茅、南薑、青檸熬製，酸辣味道濃烈且清新，帶出強烈嘅泰式風味，配上鮮嫩嘅蝦肉或魚片，每一啖都充滿刺激感。黃咖喱軟殼蟹亦係人氣之選，軟殼蟹炸至酥脆，口感輕盈而不油膩，浸喺香濃嘅咖喱醬入面仲可以保留到口感，最正嘅係佢個麵包盎，畀咖喱浸完之後勁香濃。另有鹹蛋魷魚、蟹肉奄列同芒果糯米飯都值得一試～
文：Yanica
編：Cathy
