香港人終於可以去旅行啦，但要搶機票都唔係咁易，而且台灣暫時都仲係3+4，搶唔到嘅留住喺香港食好西先喇～今期介紹4間幾受歡迎嘅台式火鍋畀大家，有台灣最流行嘅吃到飽模式，亦有sell特色湯底同配料嘅，間間都咁吸引。

性價比高任食套餐 牛品台式火鍋 

由屢獲殊榮嘅台灣廚師李龍翔師傅主理，湯料每日新鮮由台灣直送，除咗供應正宗台式風味湯底，亦有富有香港特色嘅湯底。招牌包括牛品一品鍋，配合台灣元素牛三寶（牛筋、牛肚及牛內臟），湯底超濃郁滿滿牛香。另外仲有元氣養生雞湯鍋、花菇昆布鍋、黑蒜黃金蜆鍋、剝皮辣椒雞鍋同沙茶海鮮鍋等。配料方面台灣直送麻辣鴨血、大甲崧化芋頭、棒球貢丸都值得一試，甜品更包括台式芋圓及Movenpick雪糕等。價錢分4個等級，主要以和牛質素嚟區分。

無限時放題 鍋霸吃到飽台式養生火鍋  

一間好有人氣嘅台式火鍋，皆因佢有無限時任食，食嘅時候完全無壓力，最啱同朋友Gathering，唔使畀人追交枱呀嘛！湯底方面都幾多配搭，如麻辣番茄、椰子雞、藥膳沙茶及醉雞鍋等，款款都真材實料。配料方面都一樣好有誠意，好多都係手工配料，如手工黑松露墨魚丸，仲食到粒粒墨魚粒；手工麻辣粟米豬肉餃都香濃惹味。以放題嚟講，價錢可能高少少，但都算物超所值呀。

圖：bellywongs

最平$158任食 好呷台灣火鍋

幾個月前新開嘅台式火鍋店，主打9款台式養生湯底同秘製醬汁。醬汁係自家製人參沾醬及麻香辣醬，前者帶有淡淡人參香氣，餘韻回甘；後者香辣惹味。台灣小吃自助區都好吸引，無限提供超過20款台灣夜市小吃，如台灣腸、滷味、古早蛋餅、鹽水雞及鹽酥雞等，迎客小食係甘梅爆米花，食完零舍開胃。午市最平$158就食到，係抵食嘅。

稀有騸牯牛頸脊 御老鍋台式火鍋 

湯底係火鍋嘅靈魂，呢間嘅湯底絕對唔會令你失望。所有湯底都有養生效果，打破食火鍋油膩同對健康無益嘅印象。秘製麻辣鍋寧神靜心鍋加埋水果熬製，香麻帶辣勁同時順滑而不搶喉；正宗台灣薑母鴨鍋使用三年以上嘅老薑熬製而成，溫而不燥。配料方面有8款必食菜式，騸牯牛頸脊肉質入口鮮嫩香，又唔會太老太韌，人氣招牌秘製肉鬆響鈴令人驚喜，香脆響鈴包裹住肉鬆，味道層次豐富。

文: Yanica