Tiramisu口感幼滑又帶有酒香同可可粉甘苦，味道有層次，好多甜品控都係佢fans！想知邊度有好食Tiramisu？開飯仔搜羅咗5間有賣高質素嘅Tiramisu畀大家，如泰式奶茶口味同帶有濃郁酒香嘅都有～

目錄

泰式奶茶意大利芝士餅 Lady Nara

通常食Tiramisu都係咖啡同酒香，呢間泰國開嚟嘅過江龍就主打泰式奶茶口味，蛋糕口感同Tiramisu一樣係好濕潤，食落好細滑，泰式奶茶味都好突出。另外會附埋一杯mascarpone cream即場倒落去，做到打卡爆漿效果，啱晒相機食先～

圖: yoyo454

人氣No.1 Page Common

一提起Tiramisu，一定會有網民推介呢間餐廳，可謂人氣No.1。呢度嘅Tiramisu比較輕盈，用咗自家烘焙咖啡豆沖泡嘅咖啡去浸手指餅，Mascarpone Cheese同手指餅嘅比例啱啱好，冇過份倚重Mascarpone Cheese而失去應有質感。外層軟滑細緻，奶油同甜味適中，正好襯托住內層浸透出嚟嘅咖啡香同酒香。

圖: RheaChim

濃郁酒香 Amaroni's New York Italian Restaurant 

鍾意濃濃酒香嘅朋友，可以一試呢間意大利餐廳。佢哋嘅手指餅用濃縮咖啡同咖啡酒浸過，芝士忌廉再額外加咗瑪莎拉酒，所以酒味比較突出同時亦食到芝士香，面層可可粉比例都啱啱好，難怪每枱客人都一定會叫。

圖: Billy Catch、JoJo.Gdluck

開心果口味 The Coffeeology

招牌原味Tiramisu只於星期五至日供應，想食要預啱時間呀。呢度嘅Tiramisu最出色係質感滑得嚟又夠挺身，mascarpone cheese層次夠多，手指餅酒香同咖啡味比例好完美～另外仲有開心果口味，超濃開心果味又唔太甜，食過原味嘅朋友可以試下，唔係周圍都有呢款口味呢～

圖: jcpigpigzhu

充滿咖啡醇香+酒香 Al Forno Cafe and Bar 

同樣係餐廳嘅招牌甜品，手指餅先用咖啡加酒浸透，口感綿密而充滿咖啡醇香同酒香。中間嘅忌廉非常Creamy，有濃厚芝士味同蛋香，再加埋上面嘅可可粉，味道香濃而甜度適中，口感柔軟濕潤，最緊要係食完唔會覺得膩。

圖: tiffsuet

文: Yanica