和牛控再多一間餐廳要潮聖！中環呢間新店主打嚟自日本鹿兒島嘅小田和牛，更係全港獨家供應。以廚師發辦形式，結合時令食材，推出精心設計嘅午市及晚市懷石料理套餐。吧枱格局更可以令食客欣賞到席前備料、烹調嘅過程，享受獨一無二嘅餐飲體驗。
 

餐廳佔地逾800平方呎，吧枱可坐13位客人，另設VIP房

肉味香濃小田和牛

犇 Ushidoki 2015年喺新加坡開業，2019年獲米芝蓮推介，而中環店係首間海外分店，特別引入現時全港獨家嘅小田和牛炮製菜式。小田和牛嚟自鹿兒島縣薩摩半島南部嘅牛舍，飼料配方、牛舍環境等都有考究，因而養育出擁有大理石油花、肉味香濃嘅和牛。整個套餐會利用到小田和牛嘅唔同部位，以「tongue to tail」為概念，畀大家品嘗多元風味。
 

主廚長谷川倫紀先生（圖左）曾效力於多間高級日式料理

午市菜單一覽

餐廳另一特色係以廚師發辦形式供應懷石料理，定價為午市$1,300/位及晚市2,000/位。由經驗豐富嘅總經理菊地良幸先生及主廚長谷川倫紀先生主理，兩位均先後於多間日本頂級料理及酒店任職，經驗豐富。
 

冷鉢：和牛配烏魚子及土佐產香醋啫喱

選用肉質柔嫩嘅西冷，輕灼幾秒後配搭自家製山藥泥、日本秋葵、蕃茄，加上以土佐產香醋製作而成嘅透明啫喱，最後以即刨烏魚子碎提香。牛肉加上山藥泥同啫喱，入口更為嫩滑。啫喱微酸，可以解膩同時開胃。
 

座付：牛舌湯配水葵及柚子

熱湯用大量牛筋丶牛骨丶黑薩摩雞同鰹魚慢火熬煮而成，香氣淡雅、味道甘甜，加上軟嫩富牛香嘅澳洲牛舌、多汁嘅日本大根，再以柚子皮點綴，淡麗鮮香。
 

溫物：壽喜燒配溫泉蛋

即席現刨嘅黑松露片固然係一大亮點，但主角依然係軟嫩入味嘅小田和牛，油脂香氣加上香甜嘅秘製壽喜燒醬汁，味道平衡得宜。口感滑溜嘅「太陽の卵」溫泉蛋、香甜嘅洋蔥絲、香氣馥郁嘅松茸亦非常加分。
 

箸休：柚子青梅雪葩

以柚子及青梅製作而成，雖然叫雪芭但口感更偏向刨冰。冰粒入口即溶、酸甜清爽，清一清味蕾以迎接下一道菜式。
 

廚師發辦形式懷石料理

替鉢：紅酒燉和牛柳及賀茂茄子

以紅酒、肉碎製作香濃醬汁，配搭肉質最為細嫩嘅和牛牛柳，兼具牛肉香氣同嫩滑嘅口感。配搭同樣口感偏軟嘅京都茄子及魚糕。
 

燒物：炭燒和牛配時令蔬菜

以傳統炭燒方法燒香和牛牛腩，半熟粉嫩最能夠突顯小田和牛嘅濃厚肉味同入口即溶嘅脂香，咬落更係充滿肉汁。時令蔬菜同樣經過炭烤，帶炭火獨特風味。
 

食事：招牌和牛壽司伴冷麵及牛尾凍

是日壽司會有兩款，建議先食以魚子醬提味嘅和牛刺身壽司，再食佐紅酒蘋果醬汁嘅灸燒和牛壽司，前者以肉味同魚子鹹鮮為主，後者經過輕炙脂香更為突出、再以醬汁平衡膩感。冷麵則選用幼身嘅素麵，配搭同牛尾燉煮六個鐘而成嘅牛尾凍、三文魚子、海膽及蛋汁，多重鮮味層次豐富。
 

水菓子：最中餅配雪糕伴自家製布丁

最後以香脆最中餅配搭甜美雪糕，以及綿密嘅自家製布丁，為大餐畫上完滿句號。
 

晚市限定打卡菜式

向付：和牛他他配魚子醬及海膽伴皇室海苔

晚市套餐會更為豐盛，包括有呢道和牛他他配魚子醬及海膽伴皇室海苔，和牛背峰肉加上秘製醬汁及毛豆製作成口感層次豐富嘅和牛他他，加上時令海膽及俄羅斯精品魚子醬增添嚟自海洋嘅鮮甜味。再配搭「宮崎皇室海苔」天婦羅，增添酥脆口感。
 

強肴：自家製松露醬和牛三文治

以外脆內嫩、肉味濃郁嘅吉列和牛肉眼，配搭香氣獨特嘅松露醬汁同烘至微脆嘅麵包，最後加上時令海膽或精品魚子醬，一口就能夠細嘗極致鮮味。賣相亦相當別緻。
 

犇 Ushidoki
地址：中環皇后大道中48號萬年大廈1樓2A號舖

文、相：Cathy.H