近年唔少香港人都中意上內地搵食，貪佢正宗又夠平，串串火鍋就係其中一樣啦，將食物好似串燒咁串起佢再拎去打邊爐，埋單果陣根據串串數量嚟計，又幾過癮！最近尖沙咀就開咗一間成都串串麻辣鍋，無論食物定醬料都好正宗，嚐辣又中意火鍋嘅人一定要去食吓！
鍋底有麻辣、藥膳、蕃茄同菌王四個選擇，除咗必選嘅麻辣，藥膳湯都值得一試，湯底用咗紅棗、杞子、黨參、當歸、桂圓、沙參同熬成，好足料！麻辣湯底落咗大量花椒八角，無論麻度同辣度都好足夠，溫馨一提，唔係好食得辣嘅人叫小辣已經好夠～
揀完湯底就可以去串串櫃到拎野食，大部份食材都放咗喺依個火鍋料貯存櫃到，貯存櫃有放濕功能，確保食材水份無咁易流失，食物選擇超過五十款，絕對唔怕唔啱食！
串串方面有齊各款肉類、丸類、菇類、蔬菜同海鮮，食材每日新鮮串成，淨係牛肉串都有超過五種口味，如小米椒牛肉、金菰牛肉、泡菜牛肉、冬菰牛肉同芫茜牛肉。另外下面放喺唔同顏色碟嘅食材就好似食迴轉壽司咁按顏色收費。
特色水果牛肉串，用生果嚟打邊爐，就咁聽可能好驚嚇，但其實食落口一啲違和感都無，反而好清爽，仲減輕咗辣度添！
更多【新店直擊】： |
食得辣一定要拎個豆卜串，豆卜索哂麻辣汁，一咬落去啲汁咇哂出嚟。日本鱈場蟹柳比坊間食嘅大條好多，一樣索哂汁好惹味。墨汁墨魚腸有咬口，仲食到一粒粒嘅墨魚！
另外必食嘅有串王酥肉($68)，將炸得香脆嘅酥肉輕輕放落麻辣鍋到浸幾秒，再點埋干碟，食落口仍然卜卜脆，又吸哂麻辣鍋嘅味道。
店員仲會親自幫食客調製油碟，油碟係用蔥、芫茜、蒜蓉、辣椒、蠔油同埋芝麻調和油撈成，除咗令食物更香外，仲可以舒緩辣味同埋令食物快速降溫，咁就可以食多啲啦！
一條竹籤就$5蚊，不過試業期間就有88折，指定時間仲有68折優惠添，為起都係$3.7串，好抵食！
值得一提嘅係店內嘅竹籤係選用天然柳木，為咗響應環保，竹籤係會重覆使用，使用完嘅竹籤會先放喺高壓噴射洗碗機洗淨，再放喺高溫消毒櫃，唔駛擔心衛生問題。
地址: 尖沙咀金馬倫道34-36A號福僑大廈地舖
文、相、片：Yanica