大大小小嘅拉麵店，喺香港都有唔少，但喺舖頭內自設製麵機，親自製作拉麵條嘅，就應該幾隻手指都數得晒。黃埔有間拉麵小店就係其中一間。佢哋聽日起仲會新推出11月限定——廣島蠔沾麵！連個湯底都用埋蠔肉熬製，蠔迷真心要試。

只得大約8個位嘅泓一拉麵，舖仔細細，但老闆依然買咗部製麵機返嚟，堅持自家製作麵條，為嘅係啲麵可以新鮮啲、煙韌啲、有咬口啲。選用4款日本麵粉混和製作，每條拉麵粗度大約1.5mm。而沾麵嘅麵條相對就會粗啲，大約係3mm左右。

11月限定嘅廣島蠔沾麵，絕對真材實料，上枱淨係眼見嘅都有成5隻肥美嘅廣島蠔，以牛油輕輕煎香過，有微微焦香，仲隻隻鮮甜飽滿，相當juicy。

而沾麵嘅靈魂，即係個湯底，初頭試嗰幾啖係會令一眾蠔痴一秒變心心眼，因為啲蠔味相當濃郁呀，加上粗身嘅沾麵掛湯力高，成個口都係蠔嘅鮮味。原來老闆毫不吝嗇咁，落咗勁多蠔肉去熬製呢個湯底呀，除返開平均每個湯底都有成7隻蠔打底架，怪不得咁鮮甜啦。但啖啖都咁「蠔」，係會膩嘅，所以食到中段建議可以加返少少檸檬汁，或者食下啲蔥呀菜呀中和一下。溫提一下，每日限量10碗咋。

常設款雞白湯拉麵亦值得一試，湯底以雞殼、雞骨等自家熬製8個鐘，再用攬拌機攪至起泡，口感creamy，味道香濃帶甜。

泓一拉麵
地址：德民街29號德民大廈地下F4號舖

文、相、片：Kar