法籍藝人黃長興一向都有搞開餐廳，最近佢就將其中一間喺炮台山嘅餐廳轉型，變成法式X日式X越式嘅fusion菜，重新開張。每樣食物同食開嘅有少少變奏，係幾有特色嘅。

長興話，佢喺法國巴黎十三區長大，嗰區有好多越南人同越南餐廳，所以佢對越南菜都相當熟悉，咁佢都希望可以將當地嘅特色帶過嚟香港，於是就開咗呢間集法、日、越式菜於一家嘅餐廳喇。”La mer” 係法文「海洋」咁解，顧名思義，呢間餐廳都有唔少海鮮食呀。

小喇咩招牌青口，就咁望可能會覺得同平時食開嘅青口冇咩分別，但聞落同食落就知分別大喇！用咗椰奶同香茅等材料去整個醬汁，所以成碟都有好香嘅椰奶味呀，好creamy。

近期大熱嘅食材，鹹蛋敢認第二都冇第二樣敢認第一喇。Pizza都加入鹹蛋去整，黃金流沙龍蝦蟹肉薄餅，吖，又幾香喎。不過，人少嘅話要食晒成個都應該會有啲吃力，食食下會膩…

長興特別推介越式蒜片牛肉粒炒紅飯，醃製過嘅牛肉粒，配埋荷包蛋、青瓜、蕃茄，仲有意大利飯一齊食，正正就係佢喺法國時食到嘅一樣，風味啊。

其餘特色嘅fusion菜式包括有越南常見嘅米紙卷，變成黑松露巴馬火腿米紙卷配蜜糖；生牛肉河變成越式龍蝦雜錦海鮮湯河；炸雞翼則加入意式卡邦尼芝士汁。

食完飯點可以冇甜品？甜魔唔使揀喇，火焰焦糖香蕉伴雪糕，夠晒甜！仲有啲果仁碎喺面，不過係個雪糕會溶得好快，唔好掛住餵部相機先喇。

小喇咩
地址：天后炮台山木星街18號地下F-G號舖

文、相：Kar