香港人平時咁鍾意食日本嘢，但講到裝修多數都係日式傳統風或摩登風。但上環呢間新開嘅日式餐廳就特別啲，走嘅係龐克搖滾風，對於日本菜嚟講真係少見啲。食物方面主打多款特色手卷，仲有小食及壽司刺身等，一於去rock返晚！

主要用餐區嘅前方及中央有架1980年代款式嘅日本定製電單車做裝飾，氣氛夠晒搖滾。

餐廳主要供應各式手卷，食材新鮮。另外每款手卷都加入創新元素，希望可以打破客人對傳統手卷嘅印象。

每塊紫菜都先會烘一烘，確保香脆。

辣味吞拿魚($68)

平時出街食都會成日見到辣味吞拿魚呢個選項，但呢度嘅辣醬就特別唔同，混合咗是拉差醬、韓式泡菜醬及港式豆瓣醬，最後灑上健康嘅藜麥，味道同口感都夠豐富～

新鮮油甘魚蕃茄手卷($58)

油甘魚非常新鮮，加入蕃茄及柚子胡椒，味道清新開胃。

吞拿魚熱狗($98)

先將手卷拎去炸後加入大量吞拿魚，配上柚子蛋黃醬，熱狗香脆熱辣辣又夠晒惹味。

鰻魚手卷($78)

鰻魚手卷食法就特別啲，由食客自己包嚟食～鰻魚用加入自家鰻魚醬，先蒸後焗。四季豆天婦羅亦為成個手卷增添口感。

黑毛豬炸串($108)

黑毛豬比起其他豬肉軟腍，肉汁都豐富啲。點埋自家製嘅菠蘿汁酸酸甜甜，食多兩條都無問題。

綠茶蕎麥麵($108)

驚唔飽餐廳亦有主食揀，呢個綠茶蕎麥麵醬汁清新，夏天食就最啱。

餐廳有一個「Drinks on Me！」($290)活動，只要有客人大叫一聲Drinks on Me，全場嘅人包括員工都可以得到一杯180毫升嘅酒，好有氣氛啊！

TMK

地址: 上環皇后大道西77-91號荷李活中心地下G&H號舖

文、相、片: Yanica