踏入2023年，大家對日本嘢食嘅思念同鍾愛似乎愈嚟愈濃，十強裡面有過半數嘅位置都被日本料理餐廳佔據。另外，一啲café同豆製輕食店亦有唔錯嘅競爭力，佔有一席位。
第10位 SOYmart by 豆乳狂人
圖：無論咩時間行經佢哋舖位，都總會有人喺度排緊隊。以微糖製作嘅豆乳飲品/雪糕小店，耐唔耐又會推出季節限定或新系列甜品，長期保持新鮮感。例如一月就趁住冬天推出薑汁系列，薑汁蕃薯小丸子豆花暖笠笠，仲有大大嚿蕃薯。
第9位 和藏 
圖：上環高級日式居酒屋，連續第2個月打入十強榜。去到除咗必食新鮮刺身、海鮮外，牛魔王記得要揀宮崎A4和牛壽喜燒，壽喜燒汁甜度調得啱啱好，和牛油脂分明，肉質柔軟，相當有質素。其他菜式設計及配搭亦見心思，就算茶碗蒸都好重料架，落埋松葉蟹肉同帆立貝一齊製作，特別鮮甜。
第8位 M Square （*新上榜）
圖：位於西貢酒店內嘅酒吧餐廳，樓底高又有落地大玻璃，仲設有足球機同桌球等娛樂設施。先介紹一下好多人都好欣賞嘅甜品menu，有窩夫又有pancake等，各有多款口味選擇。Pancake口感鬆軟，仲有陣陣蛋香。主菜方面，鵝肝安格斯牛肉芝士漢堡仲再加埋無花果醬，特別得嚟更有中和油膩感之作用，值得一試。
第7位 スーパー丼 
圖：主力供應各式丼飯嘅日式小店，上月因為聯乘《蠟筆小新》兼且推出「雪糕咖喱飯」，而吸引大批粉絲朝聖。雪糕加落咖喱飯度，鹹甜混集，感覺新奇，而雪糕亦令咖喱飯變得更甜滑。聯乘結束後，大家再去嘅話可以試返佢哋嘅招牌鵝肝和牛丼或者各款海鮮丼呀。
第6位 不籽是咖啡（*新上榜） 
圖：顧名思義，嚟到呢間café，唔止要飲咖啡，仲要試多啲呢度嘅特色配搭，例如龍蝦湯配牛油果大蝦稻庭烏冬。龍蝦湯味道濃郁鮮甜，以鐵壺分開上，大家可以邊食邊倒湯，咁就食到最尾都仲可以啖啖熱辣辣。稻庭烏冬口感煙韌，仲好掛湯添。
第5位 燒肉801（*新上榜）
圖：幾乎每個月嘅十強榜，都會至少有間燒肉店，今個月都唔例外。尖沙咀呢間主打日本九州產黑毛和牛嘅燒肉店，價錢親民，有多個唔同部位選擇。鍾意肉香嘅推介極上厚切牛胸腹柳同牛小排，黑毛和牛肩胛肉蘸埋蛋漿食就更香滑，牛魔王嚟到包滿足。
第4位 燚（*新上榜）
圖：由有酒店料理經驗嘅大廚主理嘅鐵板燒，無論食材定係烹調技巧都相當講究，除咗由日本直送海鮮同肉類外，師傅更會每日親身落街巿搜購游水龍蝦同鮑魚，保證新鮮。鮑魚配蒜蓉再加埋柚子海鹽泡泡，增添咗份清新感；宮崎縣厚切黑豚扒配蒜香牛油汁仲有菠蘿汁，又特別又fresh。
第3位 牛匠石燒
圖：呢間石燒牛店有埋圍裙提供，夠晒細心，加上吸引嘅menu同相宜嘅價錢，自然贏得口碑吸到一班捧場客。石燒較網燒容易控制，冇咁易燒燶嘢，就算係地獄廚神都唔使驚。日本A4鹿兒島牛肩肉油脂豐富，輕輕煎兩煎就食得；薄脆石燒吉列牛燒完外脆內嫩；牛舌控就唔好錯過厚切特上牛舌COMBO，一碟有齊厚切薄切選擇，牛舌爽口。
第2位 Shibui 洋食屋（*新上榜）
圖：一講起九龍城，個個都淨係諗到泰國嘢，其實呢間懷舊復古風嘅洋食屋都好高質，今個月都打入三甲位置。鰻魚玉子燒伴炒麵賣相滿分，玉子燒上放上大大條鰻魚，打卡贏晒眼球，鰻魚亦燒得柔軟。味噌奶醬燒雞塊烏龍麵都係主打之一，又creamy又濃味。昭和布丁係近乎每枱入食嘅甜品，蛋香十足。
第1位 喜多嬉牡蠣屋（*新上榜）
圖：任食生蠔店榮登榜首，一啲都唔令人意外。中環呢間牡蠣專門店，雖然打正旗號做60分鐘同90分鐘任食，但牡蠣嘅質素絕對有保證，係由餐廳喺日本自設嘅養殖場運過嚟。隻隻都又大隻又creamy，兼帶有陣陣海水鹹鮮香味。間中一隻配埋酸酸甜甜嘅土佐啫喱食又有小清新之感。另外要特別推介牡蠣茶漬飯，吸收晒啲精華，啖啖鮮甜。
文：Kar
