中環區地標性建築怡和大廈，最近地庫新開咗一個高級版嘅Foodhall，共有十間本地人氣餐飲品牌進駐，八間餐廳及兩間酒吧，包括本地手工啤、得獎漢堡店、資深班底主理韓國菜及人氣曲奇店等，中環友又多個搵食好去處啦！
BaseHall裝潢以金及藍綠色為主調，設計概念取材自1970年代的怡和大廈，突顯本土懷舊風情。
由Yardbird香港班底主理嘅日式烤雞餐廳Roti Tori，選用本地出產雞肉，燒雞做得出色，皮薄而且肉質嫩滑juicy，配埋紫蘇飯團好有日式風味啊。
得獎漢堡店Honbo，餐廳目的係為所有人打造 「 真正好味嘅漢堡」！漢堡採用時令嘅天然食材， 特色薯仔麵包同漢堡牛扒都係每日新鮮製作，經典漢堡肉味香濃，而且大小適中唔怕食得狼狽。
由韓國餐廳Moyo原班人馬主理嘅Moyo Sik，以自己風格製作出多款韓國菜，呢個韓式醃肉丸味道帶甜多汁，當然唔少得韓國菜嘅代表韓式炸雞啦～
想感受東南亞風味，要試吓呢間由前Beet主廚Barry Quek主理，主打變奏版馬來西亞椰漿飯嘅Return of Lemak，椰漿飯跟隨傳統以竹葉盛載，帶有香濃椰香，仲有惹味嘅喇沙啊。
另外仲有將越南人氣食店「Nguyen ThiThành」嘅食譜帶嚟香港嘅越南菜Co Thanh，牛肉湯粉及煎蛋越式法包都好地道。
由Tacos大王主理嘅Westside Taqueria，主要供應墨西哥栗米 餅，包括招牌巴哈魚捲餅及菠蘿燒豬肉捲餅，餅皮自家製作，仲加埋人氣嘅牛油果醬。
更多【新店直擊】： |
崇尚健康主義嘅朋友都有嘢啱食！Treehouse供應一系列素菜菜單，如柳扁麵包及素食擔擔麵。
呢個人氣曲奇品牌Cookie DPT供應多款自家製曲奇，包括朱古力口味、Brownie及花生醬曲奇等。
另外仲有兩間酒吧，包括供應外賣即磨咖啡、雜錦果汁同沙冰嘅BaseHall 酒吧，同埋人氣本地手工啤品牌少爺啤開設嘅Pub 1842，Pub 1842有10款On Tap啤酒及焗批等小食，如呢款好有港式風味嘅梅菜批，放工後同同事可以去Happy吓。
地址: 中環康樂廣場1號怡和大廈B1樓1號舖
文: Yanica
相、片: Yanica、餐廳供應