第10位 White Button Cafe & Dessert（*新上榜）
香港咁多Cafe同甜品店，要突圍而出總要有啲計仔。三球雪糕加上忌廉、百力枝同爆谷，放入獎杯到叫「最佳損友」，好玩又有得Selfie。下午茶更以摩天輪造型上菜，放IG吸Like一絕。其他甜品同飲品亦搞鬼創新，果汁變血包，深水炸彈變可樂加Expresso，啱哂追求新鮮感嘅香港人。
(Photos by 好好好食& Esthersee)
第9位 Princess 公主 Cafe （*新上榜）
好多女仔可能都夢想過自己就係一位公主，所以公主主題長玩長有。裝修以英倫典雅甜美風為主，食物方面當然唔少得優雅嘅Afternoon Tea Set(一定要用英文，好似係)，最吸睛嘅係玻璃鞋造型嘅紅莓乳酪，無論幾歲嘅女仔一見到頓時少女心都翻哂嚟。午市及晚市菜式亦造型精緻，贏盡公主芳心。
(Photos by yomid)
第8位 屋喔（*新上榜）
台式特色餐廳，中環店係8月打入第9位後，旺角店今個月佔據第8位。除咗肉燥飯同三杯雞等台灣傳統美食，亦有台式西餐，好似黑松露野菌蚵仔燉飯同台風雞排漢堡。飲品同甜品亦非常出色，台式特飲一應俱全，盆栽Tiramisu夠打耳。
(Photos by eat_eat_everyday)
第7位 BAKE CHEESE TART
半熟芝士撻熱潮繼續，所以呢間日本老字號依然留喺十強，門口條隊依然都係好長。可能亦同11月天氣又凍又熱有關，皆因BAKE嘅芝士撻可以常溫食之外，亦可以擺落雪櫃，流心芝士餡雪凍之後就好似芝士蛋糕咁；或者用多士焗爐再焗一陣，就有啱啱出爐果種風味。無論咩溫度，芝士撻都係外脆內軟，芝香滿分，先吸引到咁多人繼續追捧。
(Photos by supertaster mel)
第6位 Grill ขุนทอง
蘭桂坊泰式串燒店Grill ขุนทอง依然留喺十強榜，各款肉類、海鮮同蔬菜依然係用火爐即叫即燒。唔少食客都大讚佢地嘅醬汁同食材如泰式魚餅都富有泰國風味，背後原因係Grill ขุนทอง係九龍城老字號金寶泰國菜館嘅Young Line，新潮裝修嘅舖仔入面係一班資深泰國師傅。加上佢地亦有供應Singha draft beer 同泰國樽裝啤酒，真係泰享受。
(Photos by ilovedisneyland)
第5位 Next Station Dessert
食完正餐下一餐就當然係食甜品，呢間再上榜嘅旺角人氣甜品店有好多款淨係聽個名都好想試嘅甜品，例如栗香紫薯山、綠茶心太軟配綠茶雪糕、暖拖肥泡沫，仲有近期大熱芝士撻等等，不過如果第一次去嘅朋友仔，就要試下test tube喇，其實係mousse嚟嘅，3支test tube3種味，朱古力士多啤梨、伯爵紅茶同椰果菠蘿。
(Photos by Jacqueline H.& =架架麵=)
第4位 Burger Joys（*新上榜）
喺灣仔駱克道嘅burger店，採用法國米芝蓮嘅麵包，塊包仲貴過塊牛肉呀，薯條厚身夾大份，黑松露薯條都有得揀！值得一提嘅係仲有純素漢堡，照顧埋素食朋友仔嘅需要。
(Photos by ronronyip& Mr.Cuisine)
第3位 金船長餐廳（*新上榜）
由餐廳名到裝修格局都係90年代風嘅平民西餐廳，喺食肆林立嘅大角咀一帶仍然能夠突圍而出，殺入3強，全因為可以用平民嘅價錢食到一級嘅享受。其中黑松露芝士pizza最為聞名，薄脆嘅餅底舖上軟滑芝士，再加入黑松露，連食法都有3種！點食就留返畀侍應上菜時講解啦~
(Photos by mohkc)
第2位 16 Shell （*新上榜）
位於天后小街嘅西餐廳，地方唔算好大，不過就幾有情調，適合情侶或者三兩知己小聚。食物款式精美得嚟份量又啱啱好，以時下興食嘅健康食材黑蒜所製嘅黑炭黑蒜蓉包，甜得嚟略帶點酸，可以話係必試嘅小食。另外，海鮮意大利麵、意式蜆醬意大利麵、牛油白酒煮蜆等都係推介之食。
(Photos by eat_eat_everyday& VCY)
第1位 諾亞半熟蛋糕專門店
上個月１落咗榜，今個月重新上榜，呢間喺今年11個月裡面5次打入10強嘅半熟蛋糕專門店，喺一眾芝士撻同甜品夾攻底下，首次成功爭取榜首位置，恭喜晒！BTW，最新一間嘅分店喺星光行誠品內，有茉莉花茶流心、蜂蜜味等等多款選擇，聞完書香可以入正題搵食喇。
(Photos by JamTea& Yanez)
按此瀏覽「最新餐廳排行榜30強」
文：Kar/Cathy/Marcus
讚好OpenRice專頁！
