呢期最受香港人歡迎嘅潮食，肯肯定係吉列牛，一連有幾間吉列牛餐廳相繼開業，fb同ig都被洗版，其中一間仲一嚟就登上第1名，來勢洶洶。另外，踏入11月開始，天氣稍稍轉涼，令到好多邊爐怪開始出動，造就咗十強入面有3間都係火鍋店嘅局面！
第10位 良記餐廳(老鳳冰室)
經典美食久唔久就想回味一下，深水埗呢間復古主題冰室繼8月後再次登上10強榜。招牌原味波波奶茶同黑松露炒蛋多士當然係必試，嚟到冬天想食飽啲嘅話就有邪惡芝士豬頸肉撈丁同焗芝士海鮮保齡球，前者芝士汁香濃分量又夠多，後者嘅保齡球其實係大大個農夫包，仲有多一碗仔芝士汁畀大家自己點。
第9位 極品煮意 鷄煲.烤魚.火煱（*新上榜）
葵芳唔單止有個平民美食天堂葵廣，就連周邊嘅餐廳都係平靚正，呢間火鍋店就係例子之一。唔單止一個價錢有得任食唔嬲，而且除咗主打嘅麻辣雞煲之外，仲有唔辣嘅雞煲、烤魚同火煱湯底畀你揀。最抵讃嘅係肉類雖然係點單形式，但唔少食客都表示快上枱而且無漏單，其他丸類同蔬菜選擇都唔少。
第8位 辻利茶舗（*新上榜）
一開張即上到第8位！中環呢間舖仔細細嘅茶舖其實係日本京都過百年嘅老字號，引嚟唔少抹茶控去潮聖。IFC限定窩夫新地一杯有齊軟雪糕、白玉丸子、卷蛋糕、抹茶啫喱、紅豆蓉同窩夫筒，主角軟雪糕用咗北海道8.0牛奶，奶香濃郁口感幼滑，抹茶回甘慢慢滲出嚟，啱哂平時覺得抹茶苦嘅朋友仔去試。另外仲有焙茶、牛奶同抹茶牛奶扭紋口味。
第7位 豊勝手丼
睇嚟就算天氣轉涼，香港人對海鮮丼嘅熱氣都仲未減退。灣仔呢間海鮮丼小店唔單止可以自己揀刺身或者請師傅發板，另外仲有唔少配搭好嘅定食選擇。銀包夠深嘅必試沢豐雲丹丼，大大板海膽擺上碗飯到，單係賣相已經先聲奪人。食落海膽鮮甜，而且其他刺身例如牡丹蝦同吞拿魚腩都食得出新鮮，幸福度滿分。
圖：s12194
第6位 韓食（*新上榜）
雖然香港唔會落雪，不過唔代表唔可以好似韓劇講咁，一邊睇（其他地區嘅）初雪一邊食炸雞嘅。太子呢間小店出名CP值夠高，炸雞啖啖肉又做到外脆內嫩，配埋惹味嘅蜂蜜芥末或者邪惡芝士醬，唔小心就會一啖接一啖咁食哂成碗。另外仲有紫菜包飯、芝士蛋卷、泡菜炒飯同炸醬麵等飽肚選擇。
第5位 米走雞
已經係第5次上榜嘅米走雞，相信大家都好熟悉，雞煲之餘仲要係芝士雞煲，又真係幾難抵抗嘅。食到咁上下，仲可以加埋公仔麵呀腸呀牛肉呀等等落去，再追加多啲芝士都仲得，不過食食下就有啲膩喇。其實佢哋仲有麻辣雞煲揀㗎……
第4位 8鍋臭臭鍋
唔上榜都唔知，原來香港咁多人鍾意食臭豆腐。呢間主打臭豆腐火鍋嘅餐廳已經係連續第3個月上榜喇！除咗專食臭豆腐，最好就係可以一人一鍋嘛，想要芝士牛奶、沙茶牛肉都得。一班人一齊食唔使你就我我就你，自己揀返自己鍾意嘅湯底，又可以試多幾款味，幾開心。
第3位 星廚（*新上榜）
有好多人都係為咗隻大大隻嘅豬手，專誠去呢度食。事關佢嘅豬手都真係幾大隻，幾多肉，肉汁都多，而且個皮焗到脆卜卜，另有BBQ醬、芥末醬同燒汁可以點，一食三味，係唔錯嘅。不過千祈唔好以為佢係一間貴價西餐廳呀，望落去茶記格局嚟㗎，而且價錢都尚算親民呀。
第2位 Urban United Burger & Bar（*新上榜）
一睇個名就知呢度專食burger啦。以前元朗最出名就係魚生超長嘅壽司，而家輪到魚柳超長嘅漢堡喇！呢間burger店個個漢堡都好足料，尤其是係阿拉斯加特大魚堡，魚柳長到突晒出嚟，炸得幾香。牛堡嗰塊扒都一樣係厚到一個點，就算切開個口都係唔夠大一啖咬晒。同埋佢個包都必須講下，搽咗牛油烘到脆卜卜，好食。
第1位 琥酌（*新上榜）
近排大熱嘅吉列牛店，對於一嚟就進佔榜首位置表示毫不驚訝！呢間喺太子嘅吉列牛店，有兩種牛揀：黑安格斯或者日本A5黑毛和牛，兩款都會先由廚師製成半熟吉列牛，外層脆卜卜，食客就可以自己煎，想要幾熟完全由自己控制，就咁食已經好夠味，但當然想點醬都有好多款醬揀，半熟蛋漿都有呀係咪好開心？
文：Kar、Cathy
隨時接收最新資訊
讚好OpenRice專頁！
