每次返鄉下，行程都總要安排返一日半日去築地巿場，食最新鮮嘅時令魚鮮。而家機會嚟喇飛雲，香港有壽司店即將推出「築地特撰 職人の鮨」系列，總共有成11款以創新手法演繹嘅應時築地魚鮮壽司！

餐廳定時派人去到當地拍賣競投、挑選魚鮮，再將佢哋以冰鮮包裝，空運返嚟香港，再配合師傅嘅刀工同手握壽司技術而成。仔細留意今次呢11款壽司，就會發現佢哋嘅切割位，或者擺法都同平時食開嘅壽司有所分別。

清新淡味之選有鯛魚同池魚壽司，兩款魚生嘅肉質都鮮嫩爽口，其中，師傅仲會喺每片池魚嘅表面切十幾刀，再放上薑蔥，增重口感。

帶子係好多人嘅飛佛，今次系列當然會有啦，用嘅係北海道產帶子，仲特地喺帶子中間切開，兩瓣啱啱好就包住晒嚿飯；而爽脆嘅活赤貝亦有兩款造型，分別係將貝肉同裙邊製成握壽司同軍艦。

特上吞拿魚、大拖羅、中拖羅都相當新鮮，其中拖羅頂仲要放多份海膽上去，層次又再高多級！

唔少得海膽壽司啦，睇住師傅一片片海膽咁直接放上壽司飯上面，連紫菜都冇，咁就可以食到最純淨最鮮甜嘅海膽味啦，嗯，好creamy。

 鯖魚壽司、穴子壽司

千両
地址：九龍塘達之路80號又一城L1樓L1-19A號舖
全線分店：按此查閱
期間限定：6月7日至7月底

文、相：Kar