提到春天大家會諗起櫻花？定士多啤梨？沙田區有間酒店就以士多啤梨同櫻花做主題，推出春季限定嘅下午茶自助餐。士多啤梨朱古力火鍋、即製梳乎厘班戟、櫻花士多啤梨芝士蛋糕同櫻花寒天啫喱等甜品等緊大家去開懷任食！
 

2+2 café即日起至3月29日，逢星期一至五供應草莓櫻花祭‧甜品自助餐。大家記得搵多個朋友一齊去，因為每兩位可享用迷你士多啤梨朱古力火鍋一客！粉紅色嘅士多啤梨白朱古力漿，可以點雪糕、窩夫、士多啤梨或棉花糖等配料。而即製梳乎厘班戟伴士多啤梨果醬當然亦係甜魔們嘅首要目標。
 

想相機食先嘅話，記得去影咗夠哂搶眼嘅韓國士多啤梨塔先呀！原粒韓國士多啤梨加上白朱古力絲做點綴，未食先流哂口水。而粉紅蛋白紅桑子果撻嘅主角就變成原粒紅桑子，加上牛油曲奇撻皮、紅桑子果醬同入口即溶嘅蛋白餅，同樣吸引。
 

而櫻花主題甜品就包括晶瑩剔透嘅櫻花寒天啫喱、層次豐富嘅櫻花北海道奶凍，同雙重滋味嘅櫻花士多啤梨芝士蛋糕。除此之外甜品推介仲包括粉紅朱古力迷你甜甜圈同白朱古力士多啤梨心太軟。約埋BFF一齊享受春季粉紅色嘅甜蜜滋味啦。
 

2+2 café 草莓櫻花祭‧甜品自助餐
供應日期︰即日起至3月29日，逢星期一至五（公眾假期除外）
供應時間：15:15 - 17:00
價錢：$118/位（另收加一服務費）

文：Cathy