OpenRice有3大排行榜，捕捉時下最吸引大家嘅餐廳，即睇12月嘅「最多收藏」、「最高瀏覽」同「本月熱門」No.1係邊間！

【最多收藏】蝦油拉麵×醬油小食 幕多

圖：sammipanggg

只賣一款麵！呢間拉麵店只有一醬油蝦濃湯麵，可見老闆對出品極有信心，上麵時會即席喺客人面前淋蝦油，散發嘅香氣同視覺效果幾加分。湯底質地濃稠，配拉麵或刀削麵都夾；而蝦更已經剝殼，用餐夠晒方便。另外自家製醬油小食唔會太鹹，提供蝦、溏心蛋、蠔同鮑魚，而是日精選則有機會係北寄貝、蟶子等，好啱海鮮控嚟啊。

【最高瀏覽】高質海景中菜廳 六公館      

圖：sam_foodsavor、yyc1014

設有室內外座位嘅高級粵菜館，裝潢氣派有時尚感，仲可以欣賞維港美景，氣氛一流。精緻又有創意嘅點心、粵菜，如水牛奶龍蝦球、龍井燻太爺雞、茉莉花茶味意式奶凍等，味道平衡得啱啱好，同長輩或朋友嚟食餐好嘅都唔錯啊。

【本月熱門】人氣日式放題 極尚大瀛喜日本料理  

圖：creamfun

節日期間放題特別受歡迎，事關菜式夠多，食得盡興又唔傷荷包。呢間日式放題店落戶酒店之中，款式更加多選擇。時令刺身拼盤、壽司、一品料理、燒物、串燒、天婦羅、Häagen-Dazs等都可以任食！其中金牌紅燒乳鴿、鹽燒牛舌、炒蜆等大受歡迎，回本話咁易。

文：Cathy