想用親民價食到高水準嘅黑毛和牛？香港大學港鐵站附近10月新開一間石燒和牛專門店，一律選用日本A4和牛，全部都係$200有找！有大熱吉列牛選擇之餘，唔同部位牛肉更精心配搭出唔同食法，例如肉眼配唔同醬汁做三食，牛舌兩款切法做兩食，漢堡扒更內藏半熟溏心蛋啊。
 

時令日本A4和牛+特色自家醬汁

全店選用日本A4和牛，質素有保證

「頑石燒肉所」位於西環皇后大道西，10月1號（星期六）正式開業。選址就喺香港大學附近，店主希望令學生可以無負擔咁享受到和牛，定價都相當親民。餐廳按時令採購日本唔同地區嘅A4和牛，現時嘅和牛就分別嚟自鹿兒島、熊本同宮崎。加分點在於超過10款醬汁同配料，包括自家製和牛醬汁、特製香蔥、鹽麴、昆布鹽，廚師會按大家選擇嘅和牛部位幫大家配搭，如果有想食嘅亦可以請店員添加。
 

和牛肉眼原味+昆布湯+壽喜燒三食！

極上薄燒A4⿊⽑和⽜⾁眼上蓋三⾷（$168，120g），御膳套餐（+$48）

薄燒和⽜⾁眼配月見壽喜燒醬汁，特別香滑

最啱鍾意試唔同口味嘅朋友仔，皆因一份石燒和牛就可以做到三種唔同食法！可以先試原味，薄切和⽜⾁眼上蓋肉質滑嫩，油脂較多、燒過後脂香同肉香都非常豐富。然後可以燒至半熟後浸落日式昆布湯做第二食，湯帶清爽鮮味又唔會蓋過肉香。最後就係加落壽喜燒醬汁同生蛋黃當中撈勻做第三食，香甜滑溜一次過滿足。
 

外脆內嫩～吉列和牛牛小排

吉列A4⿊⽑和⽜⽜⼩排（$178，160g），御膳套餐（+$48）

用石板燒至理想熟度就食得，餐廳更有提供即棄圍裙，唔怕整污糟件衫啦

⽜⼩排油脂分布均勻，先由廚師炸至金黃酥脆嘅吉列牛，大家再用熱石板加熱就食得。食落軟腍無筋，肉香甘甜！因為油花較多加上係炸物，可以試下配昆布鹽或者柚子胡椒解膩。就咁食牛肉唔夠飽嘅話，可以加配御膳套餐，包括日式雜菜沙律、飯同蜆湯。
 

特別推介：溏心蛋漢堡扒、牛舌兩食

和⽜溏⼼蛋漢堡扒（$138），御膳套餐（+$48）

漢堡扒中間就係半熟溏心蛋，切開蛋黃緩緩流出好誘人

用和牛打成肉碎後，加入溏心蛋搓成球狀嘅漢堡扒。建議大家唔好燒得太耐，令裡面嘅雞蛋保持半熟。濃稠嘅蛋黃流心加上肉味突出嘅和牛，一啖食有齊香脆濕潤，味道同口感都好有層次。
 

⽜⾆兩⾷：蔥燒薄切⽜⾆+厚切⽜⾆芯條（$128，150g），御膳套餐（+$48）

（左）薄切⽜⾆，（右）厚切⽜⾆芯條

師傅用兩種唔同刀工處理牛舌，分別有唔同嘅口感同食法。薄切⽜⾆燒完爽脆有嚼勁，加上特製香蔥提鮮更香口。而厚切⽜⾆芯條就係爽中帶嫩，肉香豐富。
 

打卡必點！富士山特飲

富⼠⼭特飲（$36）

係飲得嘅富士山！梳打嘅藍色係嚟自藍橙糖漿，酸酸甜甜咁，加埋上面白色嘅忌廉就形成一杯好啱影相打卡嘅無酒精特飲啦。
 

⽇式威⼠忌梅酒⻄柚特飲（$48）

而呢杯特飲就用咗日本威士忌、日本梅酒調配，入口微酸同時酒味都比較出，食緊燒肉嘅時候飲返幾啖可以解膩醒胃。
 

牆上有復古日本海報同手繪壁畫，好有日本Feel～

頑石燒肉所

地址：西環皇后大道西393號地舖

文：Cathy.H
相：Michael