又到開飯仔數10強榜嘅時間，今年2月適逢初七人日加情人節，唔少人都帶屋企人同另一半去食大餐。不過估唔到到除咗抵食西餐廳之外，唔少港式餐廳都有上榜，由健康新派素菜到邪惡流沙西多，第一位仲係唔少九十後嘅回憶強勢回歸！
第10位 The Staff（*新上榜）
大角咀新開西餐廳，有半開放式廚房加上簡約木系裝修相當討喜，打開Menu一睇菜式亦相當有心思。小食芝士焗薯條配意式黑醋汁有得拉芝同時黑醋汁可以解膩，主菜選擇亦多。不過揀記得留肚食甜品，黃金心太軟配雪糕用中式奶皇漿代替朱古力，唔單止一樣夠流心又夠滑，甜咸衝擊出乎意料地滋味。
圖：霖迪
第9位 東方素（*新上榜）
可能因為農曆新年大家都食咗唔少大魚大肉，灣仔呢間新派素菜館就成功跑出。賣點係融入西餐嘅食材同擺盤，令食客有新鮮感，例如招牌蜜絲骨望落似中式咕嚕肉，咬落醬汁酸甜，以㺅頭菇仿排骨有咬口得嚟又少咗份豬肉嘅油膩。心大心細嘅話最啱午市嚟食個主菜六揀三嘅午市套餐，包紅米飯同例湯而且價錢公道。
第8位 8鍋臭臭鍋
「老是常出現」嘅8鍋臭臭鍋呢個月回落到第8位，招牌臭臭鍋其實係台式臭豆腐呢點應該唔洗再介紹啦，咁不如嚟講下呢個乍暖還寒嘅春天多咗人食嘅藥膳羊肉鍋啦。湯底有濃郁藥膳香味，可以蓋過羊肉騷味之外亦令翡翠魚豆腐、台灣貢丸、鳴門卷等配料唔洗點醬汁都一樣夠味。
第7位 亞萊嘜嘜（*新上榜）
元朗泰國越南菜餐廳，不過最近最出名嘅唔係食開嘅冬陰功或者咖喱軟殼蟹，而係佢地嘅特色蒜香包！將包切成長方條，加牛油蒜蓉焗到金黃色之後疊到成個層層疊咁上枱賣相贏哂之餘亦相當香脆，點咖喱汁食一流。另一招牌泰式香芒炒飯比較清新，清甜微酸嘅芒果肉配蟹肉絲同粒粒金黃嘅炒飯，飽肚而唔油膩。
圖：Joanna H
第6位 薯仔屋（*新上榜）
唔單止高級餐廳先至食環境，唔少樓上Cafe亦靠裝修或者配套突圍而出，例如銅鑼灣呢間就最啱各位大細路去，皆因裡面有唔少超合金玩具、漫畫書甚至街機！而且仲有Kids’ Corner畀小朋友玩。而食物水準亦相當有板有眼，凱撒沙律簡單清新，蜜汁雞翼微甜香脆，招牌菜𣁽北克鋪天薯條配醬燒豬仔骨肉質鬆軟。
【飲食潮流】： |
第5位 樂糖
將軍澳嘅呢間甜品舖，已經連續第2個月上榜，不過位置就稍為回落少少，排第五。呢度嘅甜品都幾特別，唔係得個靚字，係幾有驚喜。好似心太軟咁，你以為切開流心係朱古力溶漿咩？Sor，佢係豆腐mousse呀！另外，好多甜品舖都有嘅脆多士盒，呢度就用燒菠蘿同雲呢嗱雪糕做配料，微甜。
第4位 麵道
荃灣嘅拉麵舖又上榜啦。選擇唔多，醬油豚骨湯、伊勢海老豚骨湯同雞白湯底，湯底嘅味幾足，海老湯底仲可以飲得出啖啖龍蝦嘅鮮味，麵質亦夠彈牙，拉麵控可以嚟試下。而枱面其他調味料都係任君選擇，就連白芝麻都可以自己磨碎後再加。而可樂系嘅朋友，嚟到仲可以試埋靜岡綠茶可樂或者櫻吪可樂！
圖：第3位 華倫餐廳（*新上榜）
今時今日，西多士已經唔再係焗限於炸麵包夾花生醬餡再搽牛油同落蜜糖喇，變化多咗好多。就例如呢間餐廳咁，花生醬餡就變咗做奶皇流沙餡，一切，鮮橙色嘅奶皇就好澎湃咁湧出嚟，鹹香都算，好彩嘅話仲可以食到一粒粒嘅鹹蛋黃碎！
第2位 Cosmos Restaurant & Bar （*新上榜）
尖沙咀有唔少西餐廳，下次可以試下呢間一入榜就第2位嘅Cosmos。西餐基本有嘅元素都具備晒，仲要有件成40Oz嘅燒美國斧頭扒！大到一個點！牛味幾重，又夠juicy，最好同朋友開心些牙啦。豬手同樣都係脆卜卜，啖啖肉，連酸菜食開下胃。
第1位 Crumbs（*新上榜）
2月份嘅榜首位置，係屬於好多人嘅共同回憶！呢間乳酪店，曾經係好多香港人放工放學後嘅治癒品，可惜後嚟全線結業。但喺上年年底，又返返嚟喇，仲唔止得當年嘅原味，更加新增大熱嘅綠茶味！自選配料亦有唔少綠茶嘢揀，包括綠茶糯米糍、綠茶朱古力等等。
文：Kar、Cathy
開飯編輯推介：
2. 1月份好評餐廳十強
3. 2017亞洲50最佳餐廳 地區最佳餐廳全攻略
隨時接收最新資訊
讚好OpenRice專頁！
