踏入豬年嘅2月，你哋除咗係咁食年糕蘿蔔糕之外，仲去咗邊度食好西？2月份嘅十強百花齊放，甜品店、西餐廳、星馬菜等都有，你哋有冇邊間食過？
第10位 登堂（*新上榜）
圖：大家都開始識去觀塘工廈搵食，呢間西餐廳環境極寬敞，佔地成過萬呎，坐得好舒服。食肉獸去到可以盡情享受炭烤澳洲M5和牛斧頭扒吖，1.7kg好啱些牙。另外海膽、手拆鮮蟹肉、蟹粉、西班牙辣肉腸拼蕃茄忌廉汁扭卷粉亦好吸引。
第9位 初心冰室（*新上榜）
圖：旺角西洋菜南街有好多間餐廳，呢間能夠突圍而出打入十大，可能同冰室都有得鋸高汁扒有關。推介香草芥末籽燒紐西蘭羊扒配薯菜同烤美國穀飼西冷扒配黑松露野菌汁薯菜，肉質鬆軟。
第8位 % Arabica（*新上榜）
圖：呢間咖啡店坐擁地理之利，喺正鰂魚涌海山樓打卡熱點附近，打完卡過嚟飲返杯微苦醇厚嘅Iced caffe latte，或者帶有淡淡回甘而抹茶味香嘅matcha latte，係幾疏乎嘅。同埋佢哋啲拉花好靚！
圖：繼上年11月後再次上榜嘅呢間餐廳，最受歡迎一定係佢哋主打嘅澳洲西瓜草莓蛋糕，個個都係慕名而嚟！五層忌廉、士多啤梨、西瓜等係堅吸引嘅。當然，佢哋其他甜品好似芒果熱情果蛋糕、無花果芝士竹炭蛋糕等都值得一試。
第6位 The Pantry（*新上榜）
圖：首次上榜同時入圍優秀開飯熱店大賞「甜品組別」嘅呢間西餐廳，好可惜暫時已經結束營業。枱枱都會叫嘅即叫即做厚pancake有蛋香，空氣感適中，嗚，希望之後可以再食返啦。
第5位 花果山（*新上榜）
圖：呢間絕對係榴槤控嘅新寵，成間舖都係榴槤飲品，例如貓山王沙冰、榴槤奶蓋呀咁，飲到果肉添呀！仲有榴槤小食，churros點榴槤醬超香囉。其中一個負責人仲曾經任職於香港三星米芝蓮餐廳㗎。
第4位 微酵烘焙
呢間嚟自台灣嘅手工烘焙歐式軟包店穩守十強嘅位置，除咗三款爆漿珍奶軟歐之外，佢哋嘅茶飲同樣有心思，特別用萃茶機沖泡㗎，珍珠奶茶茶香珠甜，醇厚鹹香嘅藍芝士奶蓋茶更係香港限定。
第3位 麥金.麥金馬拉特式茶啡室
圖：上個月都有入圍嘅馬拉茶室，今個月躍至三甲，喇沙同拉茶當然係必食，肉骨茶都係，仲可以無限添飲添。肉骨茶選擇有好多呀，視乎個人鍾唔鍾意甘香或中藥材而決定啦，款款都好足料。
第2位 老夫子港式餐廳（*新上榜）
圖：老夫子係香港經典漫畫人物，應該儲落咗唔少粉絲，難怪即使呢間主題餐廳開喺九龍灣咁遠，都咁受歡迎，仲一上榜就第二位。成間舖都係打卡位，粥粉麵飯、豬手、口水雞等都有提供。
第1位 雞翼山（*新上榜）
圖：第一次上榜就係榜首位置嘅，係人氣小食店雞翼山！佢哋嘅雞翼款式多多，黑松露蒜香、鹹蛋黃、濃味三重芝士、檸香山葵蟹籽、鹹檸七、玫瑰味等。重點係，喺度食雞翼可以放低儀態，戴手套用手揸住盡情享受！
文：Kar