喺大家都唔敢堂食時，以外賣同comfort food做主打嘅餐廳自然較吃香，2月份嘅十強榜，有2間都係漢堡店，亦有café同甜品店。呢段時間，各位飲食業界嘅朋友都守得好辛苦，希望大家都可以撐得住啦。
第10位 Hero's Friday
圖：上個月榜首嘅漢堡小店，今個月繼續留守十強。Burger有多款選擇，款款都好多料，最浮誇嘅英雄漢堡仲有成9層咁多！不過嚟得嘅一定要試呢度獨有嘅pancake班堡，以pancake代替麵包，夾住充滿肉汁嘅burger係吸引嘅。班戟除咗原味仲有咖啡味揀啊，好似豬柳蛋咖啡班堡咁，咖啡味好香呢。
第9位 E FOR EGG（*新上榜）
圖：eatingchingching、or#tm66619089
大圍以雞蛋為主題嘅吐司專門店，係區內嘅人氣小店呢。幾乎枱枱都會點嘅盒子吐司，有多款口味，鹹甜都有，例如雙重三文魚芝士滑蛋盒子吐司、焦糖布丁盒子吐司等，吐司脆口有牛油香，焦糖布甸軟滑流心，夠晒邪惡。招牌奶蓋窩夫係另一打卡名物，窩夫鬆脆，中間仲有雪糕糯米糍，好有驚喜。
第8位 別忘了（*新上榜） 
圖：設有櫻花樹打卡位嘅台式料理，最近仲多埋任食120分鐘台式火鍋，牛豬羊等全部都可以無限追加，另有30款配料同15款小食、甜品等，並有台灣麻辣鍋、自家製台灣蕃茄湯等多款湯底選擇，好豐富。而家出街食嘢quota咁珍貴，抵食嘅餐廳自然係受歡迎啲嘅。
第7位 龍點心（*新上榜）
圖：以創意行先嘅點心品牌，將傳統點心賦予新意，例如蝦餃，就加入菠菜餡變成綠色嘅蟹粉菠菜香蝦餃，上面重有啲三文魚籽𠻹；又例如燒賣就變成麻辣牛肉燒賣，好香口。仲有好多人鍾意嘅酸菜魚，都混入咗點心中，製成酸菜魚鳳眼餃，有微微花椒香。疫情下大家都悶悶地，難得有新嘢試下，當然大獲好評啦。
第6位 Neko Puff（*新上榜）
圖：位於屯門嘅呢間拿破崙蛋糕店，大有來頭，佢哋嘅拿破崙曾經得到世界賽冠軍，而且仲係選用法國直送嘅原材料製作，當然吸引一眾甜品控慕名而來，訂單日日接唔停。推介甜度適中而口感豐富嘅香蕉麻薯朱古力拿破崙，同埋層次分明嘅伯爵茶無花果拿破崙蛋糕，酥皮鬆脆，牛油味重。
第5位 茶東西（*新上榜）
圖：新派少少嘅茶記，除咗一般嘅沙嗲牛麵之外，連韓國芝士麵都有，另外仲有挪威三文魚班尼迪蛋配酸種麵包、咖喱滑蛋蓋飯等café先會出現嘅美食，賣相靚㗎都。班尼迪蛋流心嘅，麵包烘得香口，值得一試。
第4位 捌壹壹（*新上榜）
圖：cc.nomorehangry、RiceComeOpenMouth
2月都凍咗好一段時間，有唔少朋友都會揀食雞煲。而呢間舖仲有酸菜魚揀，冷鍋酸菜魚份量十足，魚肉片又多又滑，酸辣平衡又過癮，最開心係煙煙韌韌嘅寬粉索晒啲汁，好入味。
第3位 SOYmart by 豆乳狂人
圖：cindy_ting_ting、diadelicacies
上個月第9位嘅豆乳店，今個月躍升至第3位，多款健康、多豆微糖嘅豆乳飲品深受歡迎，豆花、芋圓等亦係人氣選擇。小店另外亦有多款小食供應，特別要介紹下同豆漿好夾嘅粢飯，除咗傳統嘅油炸鬼肉鬆餡，仲有創新嘅牛油果、炸豬扒、鰻魚等口味，帶畀大家好多新鮮感。
第2位 走過十萬八千里找到你（*新上榜）
圖：foodiesgirl_hk、FoodBurnerLum
以乾花為主題嘅樓上咖啡店，個個位都係打卡位，贏在起跑線上啦。餐廳菜式多元化，日、台、意等元素都有。招牌菜明太子岩鹽燒蟹棒貓耳朵，唔係太多地方食到貓耳朵，加上明太子醬汁濃郁帶奶香，理所當然吸引好多人嗌。另外明太子黃金醬薯條都係推介之選，啖啖鹹香。
第1位 食包（*新上榜） 
圖：foodmeow
榜首嘅餐廳同上個月一樣，都係食漢堡嘅。最多人食就係手打牛皇漢堡，牛肉味香濃仲好juicy，夾埋流心蛋、新鮮番茄同生菜等，大滿足。豬牛薯堡一樣多人鍾意，有埋塊脆薯餅，口感仲更加豐富𠻹。不過相信呢間餐廳得到榜首嘅原因係，佢哋仲有一樣秘密武器——大大塊姜man打卡版喺舖頭啊！
文：Kar
