2021年「亞洲50最佳餐廳」完整名單新鮮出爐！今屆頒獎典禮同去年一樣以虛擬頒獎典禮進行。今年香港共有十一間餐廳上榜，係亞洲之內最多餐廳上榜嘅地區，最有驚喜嘅可以話係大班樓首次奪得「亞洲最佳餐廳」殊榮！
第1位 大班樓（↑）
上年第2嘅大班樓再上一級，成為「亞洲最佳餐廳」及「中國最佳餐廳」！無獨有偶今年米芝蓮亦再次給予大班樓一星評級。餐廳主打傳統粵菜，選用有機及本地時令食材，招牌菜雞油花雕蒸大花蟹配陳村粉就係代表作之一。
第16位 VEA Restaurant and Lounge （↓）
由上年嘅12位略跌至16位嘅呢間新派酒吧餐廳，供應結合亞洲特色嘅新派法國菜，配搭具獨特創意。餐廳29樓為酒廊，30樓為餐廳，能夠一直留喺榜上，今年更同時奪得「Gin Mare 待客藝術獎」，行政總廚Vicky Cheng及調酒師Antonio Lai都功不可沒。
第17位 Neighborhood （↑）
法式小餐館Neighborhood名次再升，裝修簡約舒適，由店主兼主廚David Lai主理。採用時令食材，特別係海鮮，所以每個星期都會更換菜單，令食客可以品嘗到最新鮮嘅味道。
第25位 Belon （↓）
雖然由第4位跌至25位，但呢間新派法式餐館最近喺中環重開，由主廚Matthew Kirkley掌駝，保留舊店招牌菜包括酥皮乳鴿嘅同時，亦會帶嚟一系列新菜式，貫徹用心炮製、精益求精嘅精神，可以期待下年名次再進步。
第28位 Caprice（重新上榜）
繼2018年奪得第46位後，隔咗3年重新上榜嚟到第28位，餐廳位於中環四季酒店，係本地經典高級法國餐廳之一，由名廚 Guillaume Galliot 主理，採用精選法國空運食材，配搭一系列精選美酒。
第33位 8½ Otto e Mezzo BOMBANA （↓）
同舊年第32位分別唔大，餐廳由意大利名廚Umberto Bombana開設，供應精緻嘅意大利美食。餐廳採用嚟自世界各地嘅上等時令食材，當中最具代表性嘅一定係松露菜式，皆因Umberto Bombana有白松露之王嘅美譽。
第37位 Amber （↓）
位於中環置地文華東方酒店嘅高級法國餐廳，美食總監Richard Ekkebus擅於以創新方法烹飪法式菜餚，運用精心採購嘅食材，以及結合可持續發展嘅實踐。2019重開後菜式更向無麩質及無牛奶成分方向發展。
第38位 Ta Vie（重新上榜）
主廚佐藤秀明曾主理日本傳統懷石料理天空龍吟日本料理香港分店，後來自立門戶開設呢間精緻法日菜餐廳。佐藤秀明嘅理念為「純粹、簡約、時令」，挑選時令食材，以簡單的煮法及調味，將食材的原味完美呈現。
第44位 MONO（新上榜）
2020年新開嘅現代法國菜餐廳今年首次上榜，成為香港新上榜唯一代表。主廚 Ricardo Chaneton大有來頭，曾於世界50佳餐廳排名榜首嘅Mirazur擔任主廚，擅於以傳統法國高級料理烹飪技巧打造出精緻嘅菜餚。
第47位 龍景軒（↓）
同樣位於中環四季酒店，龍景軒主打正宗粵菜，由行政總廚陳恩德主理，連續12年蟬聯米芝蓮三星。原隻鮑魚雞粒酥、龍帶玉梨香均為招牌點心，另外北京片皮烤鴨及上湯焗龍蝦球亦係必食菜式。
第48位 家全七福（↓）
位於灣仔嘅高級傳統粵菜酒樓，由前福臨門主理人徐維均先生創辦。邀請有豐富經驗嘅師傅坐陣，務求以最優質上乘嘅時令食材，加上精湛廚藝去演繹各款經典名菜。酒樓中更有魚缸飼養多款生猛海鮮。
延伸閱讀
《2020亞洲50最佳餐廳 》香港上榜名單
《2019亞洲50最佳餐廳 》香港上榜名單
《2018亞洲50最佳餐廳 》香港上榜名單
《2018亞洲50最佳餐廳 》地區精選推介
《2017亞洲50最佳餐廳 》香港上榜名單
《2017亞洲50最佳餐廳 》地區精選推介
《2016亞洲50最佳餐廳 》香港上榜名單
《2015亞洲50最佳餐廳 》香港上榜名單
文：Cathy