母親節要令媽媽甜入心，一於買個靚靚蛋糕順便打卡啦～

大甲香芋麻糬忌廉蛋糕 Lady M

首次登場嘅大甲香芋麻糬忌廉蛋糕，以台灣盛產嘅大甲芋頭同綿密嘅海綿蛋糕製作。面層夢幻漸層粉紫色搭配藍色矢車菊花瓣、銀箔水滴寒天作點綴；而夾層中嘅蘭姆酒香芋忌廉同自家製鮮奶麻糬，入口食到有芋頭粒粒，牛奶香氣幾突出。

日本白桃雲呢拿蛋糕 W HONG KONG

蛋糕設計成粉紅色優雅玫瑰造型，帶媽媽重回少女感覺～蛋糕用法式杏仁海綿蛋糕做底層，以白桃果醬帶出桃嘅天然風味同甜度，再加入大溪地雲呢拿香草，口感香滑軟綿。留意要提前最少3日預單，睇啱就立即行動啊～

花束+復古蛋糕系列 Soulgood Bakery

呢個創意甜點品牌，最近推出多款IG-able嘅蛋糕，其中莓莓花束巴斯克芝士蛋糕，顧名思義採用花束造型，花形裝飾用低糖豆蓉製成作，唯美又IG-able。而復古系列之中，Soulgood心心毛毛自拍復古蛋糕係主理人原創嘅設計，蛋糕面層裝上鏡子，任由你發揮想像，拍出別具意義嘅照片，同媽媽創造獨特嘅回憾～

優雅花卉造型蛋糕 The Cakery

主打健康純素蛋糕嘅品牌，以花卉造型蛋糕同杯子蛋糕慶祝今個母親節。其中無乳製「Love Your Mom」蛋糕用「紅玫瑰」同精緻嘅粉色奶油作裝飾，表面更以紅色線條勾劃出心形同「媽媽」字樣；而復古漩渦線條同褶皺裱花裝飾高貴典雅，展現出優雅同女性化嘅完美結合。

白桃伯爵茶忌廉蛋糕+香芋麻糬戚風蛋糕 LUCULLUS

如果媽媽鍾意香芋口味，仲可以揀呢個香芋麻糬戚風蛋糕，用台灣香芋製成嘅綿密香芋蓉、香芋忌廉同鬆軟香芋戚風蛋糕，夾心加入煙韌又大大粒嘅麻糬，再以新鮮藍莓、朱古力片、銀箔等作點綴，感覺高雅清新。品牌仲有白桃伯爵茶忌廉蛋糕，入口陣陣茶香；加上朱古力榛子脆脆餅底，法國白桃果蓉配日本白桃做夾心，以及面層鋪滿白桃啫喱，口感層次好豐富。

文：Cathy