新日式燒肉放題店登陸荃灣！供應五款套餐選擇，可以食到頂級和牛嘅唔同部位。仲特別從日本九州佐賀農場空運直送「一頭買」頂級佐賀和牛！另一推介係煙燻壺漬封門柳，用蘋果木煙燻然後加上唔同醬汁，帶起肉味。亦有多款產地直送嚴選食材，唔同肉類、海鮮、小食等應有盡有，配自家調配醬汁食得盡興。
 

佐賀燒肉谷供應五款燒肉套餐，最平嘅Set A計埋星期一至四早鳥或宵夜優惠最平都係$208/位。最豐富嘅Set E唔單止可以食到最多品項，任飲清酒、啤酒，仲可以加$688食佐賀頂級和牛拼盤！牆上嘅Graffiti係吉祥物「Guudzilla」 ，由香港塗鴉藝術家曾昭昶（Uncle）創作。
 

佐賀頂級和牛拼盤（開業優惠價$688，原價$1388，只限Set E放題加點）

大廚介紹佐賀和牛係日本黑毛和牛當中嘅名品，油花分佈有A4或以上嘅等級，霜降等級亦有B.M.S. 7.0以上，肉質柔軟而且脂肪細滑。呢個拼盤有七個唔同部分，可以食到唔同部位牛肉嘅風味。
 

例如最大塊嘅西冷肥瘦均勻、口感軟嫩，牛板翼油花豐富、帶旨味，肉眼比較厚身、肉汁豐富入口即溶。燒肉以外仲有自家他他Shake同和牛壽司，前者加上醬油漬蛋黃同韓國紫菜，令口感更滑嫩又增加香氣；後者和牛入口即溶似拖羅，壽司飯加上麻油增添風味。
 

激罕煙燻壺漬封門柳（Set C至E放題）

封門柳每隻牛只有一條，係牛嘅橫隔膜外嘅肌肉，油花少但肉味非常香濃！大廚特別以蘋果木煙燻增加香氣，而且有原味、日式醬油同韓式辛辣三款味道選擇。建議大家可以將封門柳打圈放喺中間燒，半熟後再剪成一塊塊方便食。肉質滑嫩，越咬牛香越出！
 

 

牛肉拼盤（Set C放題）

落單前店員會按客人選擇嘅放題種類送上拼盤，如果第一次去食建議揀Set C，價錢合理而且可以食到多款牛肉部位，包括牛舌、牛肩胛、一口牛、牛肋肉等等。牛舌爽口軟嫩，牛翼板柔軟多汁，牛肋嫩中帶韌。
 

海鮮拼盤

牛肉出色之餘，其他肉類同海鮮都有多款選擇，包括半殼青口、墨魚仔、清酒煮蜆、帆立貝、蝦仁、多春魚、白豚梅花肉、無激素手羽等等。
 

自家醬料（味噌燒肉醬、味付蒜油醬、佐賀燒肉汁）

餐廳有四款自家調配醬汁，味噌燒肉醬用韓國味噌加上日本辣醬，甜辣風味配豚肉再用生菜包嚟食就最夾；味付蒜油醬用上大量蒜蓉，香氣十足帶微酸可以配牛肉同海鮮；佐賀燒肉汁採用日本醬油調配，甜中帶鹹搭牛肉或者豚肉都得。
 

自助吧

除咗用手機Scan QR code落單之外，外面自助吧亦有大量沙律、蔬菜、小食、飲品同甜品可以任拎任食！建議可以攞生菜包燒肉食，健康啲又解膩。記得留肚食軟雪糕，自己唧又有唔同Toppping揀，好玩又好味。
 

佐賀燒肉谷 
地址：荃灣眾安街55號大鴻輝(荃灣)中心1樓02號舖

文、相：Cathy