又到咗大胃王最愛嘅自助餐時間啦！3月份精選推介嘅自助餐包括有重開嘅五星級酒店Buffet、以和牛做主打嘅、榴槤甜品同靚景自助餐，睇下邊間最啱你心水～

目錄

國際自助餐體驗 港畔餐廳

麗晶酒店（前名洲際酒店）翻新重開，當然就要去食返餐自助餐啦，仲有靚景，可以睇晒成個維港喎！昔日主廚陳福和回歸，積極提升菜式嘅質量，希望喺自助餐中都供應到高質素食物，食完一次好似去咗環遊世界咁～日式有一系列日本直送嘅新鮮刺身同自家製壽司，西式有烤肉同自家製薄餅，仲有招牌喇沙、印式羊架同花雕鴨肝等。海鮮嘅話包括皇帝蟹腳、北海道帶子、日本蒸鮑魚、新鮮紅蟹、新鮮龍蝦、海膽、虎蝦同三文魚籽，選擇好多元化！而且午巿晚巿、平日同周末嘅菜單都有唔同，大家無論邊個時段去都總有新鮮感。

全新榴槤甜品 The Market  

呢間酒店一向都好出名嘅榴槤甜品，而家唔使等榴槤盛宴嗰排先有得食啦，新加咗入自助餐度，仲要午巿晚巿都有得食！新加嘅榴槤甜品包括榴槤芝士撻、榴槤斑蘭卷、斑蘭榴槤糯米糍、榴槤布甸同埋以貓山王及D24製成嘅招牌榴槤雪糕，而榴槤糯米飯配貓山王果肉、榴槤咖央菠蘿包同榴槤杏仁酥更係全新推出嘅甜品，榴槤香勁突出，聽到都心心眼呀！而嚟緊3月15號起仲會加入多道正宗泰國皇家菜式，以慶祝泰國潑水節。當中包括鮮爽嘅生蝦刺身配秘製海鮮汁、以13款香料製作嘅十三香沙律，佐底嘅新鮮荷花葉都可以一齊食架、另外仲有香脆惹味嘅避風塘香茅炒軟殼蝦都係推介。

滋味和牛自助餐 Cafe 103 

如果你係大胃王兼牛魔王，呢間自助餐你一定鍾意，因為佢今期以和牛做主題呀～選用來自澳洲嘅頂級和牛，以濃郁嘅肉味及富大理石紋嘅脂肪而深受歡迎。最推介燒和牛肋骨及和牛壽喜燒，前者牛味香濃，肉質軟腍，又充滿油香；後者切成薄片，有入口即溶嘅感覺，甜甜嘅醬汁令人愈食愈開胃。每位食客每人更會獲送一份拉丁美洲風味嘅酥皮和牛批，香口惹味。

高質週末自助餐 ADD+

食自助餐都可以食埋個靚景，呢間喺西九文化區嘅創意多國菜，供應嘅自助餐主打一系列海鮮冷盤、北京填鴨同烤肉，啱晒食肉獸～唔係好多Buffet有得食北京填鴨架咋，外皮超香脆，包埋配料同海鮮醬一齊食，一入口係滿滿嘅油香。烤肉燒得好香，肉味香濃質感軟腍。好啱放假時入嚟嘆呀。（留意返，3月10號開始供應，逢星期五、六先有架）

文: Yanica
編：Kar