斑蘭散發獨特嘅甜美香氣，經常喺東南亞料理中出現，無論整甜食定鹹食都得。香港都有唔少賣斑蘭甜品嘅餐廳，款款都好吸引～

斑蘭戚風蛋糕 班蘭咖啡

圖：littlewhitemouse

只賣蛋糕、甜點同飲品嘅餅店，主要係賣斑蘭製品，選用新鮮斑蘭葉，無添加人造色素同香精，所以佢嘅產品只有淡淡嘅淺綠色。招牌斑蘭戚風蛋糕口感特別輕盈鬆軟，有天然嘅斑蘭味道同香味，而且每次只焗製少量，所以買到嘅都係即日新鮮熱辣出爐！想有啲口感可以試埋鮮斑蘭合桃戚風蛋糕。另有原味斑蘭卷、斑蘭板栗卷同斑蘭芒果芝士卷等供應～

街坊糕點舖 龍媽媽糕點

圖：Hello Nolo

一間好足料嘅街坊糕點舖，主打各式傳統糕點，當中最吸睛嘅梗係呢款熱賣嘅椰汁斑蘭卷！椰汁味好香濃，再配上清香嘅斑蘭味，完全係好天然嘅味道，造型好似舊時嘅菲林卷，睇橫切面可以見到有好多層，足見師傅功架，口感軟滑彈牙。

斑蘭主題蛋糕店 Pandan man

由網店起家嘅斑蘭蛋糕專門店，除咗原味仲有多款口味配搭，如芒果、芋頭、芒果糯米飯、黑芝麻、貓山王榴槤同無花果等。不過想食到最出嘅斑蘭味當然要食原味，用新鮮斑蘭葉製作，味道清香；配新鮮芒果都係唔錯嘅選擇，味道清甜；芋頭味則食到香芋粒粒，真材實料。另有斑蘭糯米糍同斑蘭抺茶白朱古力曲奇供應。

斑蘭布甸法包配自家製椰子雪糕 Lúa   

圖：hkfoodking

位於銅鑼灣，好啱相機食先嘅越南餐廳，甜品必叫呢個斑蘭布甸法包配自家製椰子雪糕！上枱時法包熱辣辣，外皮非常香脆，內裡嘅斑蘭布甸軟滑流心，而且好香好香斑蘭味，味道香甜，而椰子雪糕味道天然唔甜膩，啱啱好可以中和一吓。

文：Yanica
編：Cathy