而家正正係櫻花盛開嘅季節，冇出國賞櫻嘅，去食下櫻花主題嘅料理感受春日氣氛都唔錯呀～最近唔少餐廳都襯住春天推出以櫻花作主題嘅菜單，由台灣菜、日本菜到櫻花甜品都有，啱晒打卡呀！

目錄

春日櫻花祭 Italian Tomato

講到櫻花飲食文化最精彩嘅地方就一定係日本！呢間日式糕點品牌最近推出春日桜花祭，推薦櫻花士多啤梨忌廉蛋糕，香甜士多啤梨配櫻花麻糬忌廉，淡淡嘅櫻花香令蛋糕味道更清新～櫻花白桃焦糖忌廉蛋糕都值得推介，焦糖香氣好突出，配埋香甜嘅白桃原來好夾。4月14日起更會接力推出多4款甜點，包括櫻花雙重芝士慕斯蛋糕及櫻花蒙布朗等，聽到都覺得好吸引～

春日花漾美饌系列 稻埕飯店 

有無諗過食飯都可以學埋插花呢～呢間台灣菜同著名花店LPV合作推出花藝 X 稻埕春日花漾盛宴，套餐包括約1小時嘅春日花杯插花工作坊，由專業花藝師主導，係一個好好嘅體驗。套餐就包括櫻花·玫瑰花雕龍躉卷，先用花雕蒸香龍躉，伴上玫瑰花及鹽漬櫻花製作嘅醬汁，淡淡嘅醬汁唔會蓋過龍躉鮮味。另外有桃園干貝酥、台灣蔭豉日本珍寶帶子、塔香百菌鮑魚、草莓甜酸香煎美國安格斯牛柳粒及鮮魚湯櫻花蝦津白，仲有春日甜品同特飲添呀。

日期: 4月11 日/ 4月18 日/ 4月25 日(星期二) 每場10位

地點: 銅鑼灣登龍街 18 號 V POINT 地庫

時間: 晚上 7:00pm-8:00pm 花藝班/8:00pm-10:00pm 晚餐

限定料理長精選櫻花祭 權八居酒屋 

尖沙咀店限定嘅料理長精選櫻花祭，前菜櫻花蝦梅子汁沙律好開胃，刺身包括吞拿魚腩、櫻鯛及赤貝同埋櫻花磯煮鮑魚，每一款都好新鮮。主食有迷你海膽三文魚子櫻花蝦丼，櫻花蝦嘅香味為成個丼飯生色不少。另外仲有兩款炭燒料理，自家製汁燒櫻葉免治雞肉軟骨棒配生宮崎太陽蛋及一口和牛伴福岡青椒，前者香濃惹味，後者入口勁重油香，出色！

櫻鯛主題早午餐 KYOTO JOE 

3、4月唔止係櫻花盛開嘅季節，仲係真鯛當造之時。中環呢間日式居酒屋就以天然真鯛為Brunch主題，無論係刺身定係熟食料理中均可一嚐真鯛嘅魚鮮真味。早午餐menu內包括有十幾款無限量供應嘅任食前菜、沙律、爐端燒同炸物，當中特別推介略帶焦香嘅鹽燒櫻鯛。櫻鯛刺身魚味清甜突出，另外主食中嘅櫻鯛魚紙火鍋亦值得一試，配以鯛魚竹輪、山茶茸和春菊菜，清新淡雅。

供應時間：2023年3月4日至4月30日，逢星期六、日及公眾假期（4月5日除外），中午12時至下午3時

文: Yanica