串燒都可以話係香港人其中一樣comfort food之一，同朋友聚會飲酒食或者下午茶同宵夜食都係一個好選擇～串燒有分多個門派，各有特色，今期介紹5間串燒店畀大家，港式、泰式、川式同日式都有，一定有一間啱你食！

秘製沙嗲醬+酸辣汁 金泰沙冰

九龍城人龍串燒店，推薦嘅串燒有雞全翼、豬頸肉及雞軟骨等。雞全翼好大隻肥美，肉質嫩滑juicy，雞皮又燒得夠脆，而且一入口係滿滿炭火香，出色！豬頸肉肥瘦平均，油脂味香，肉質仲好爽口。至於雞軟骨好酥脆，軟骨部位又唔會太硬。不過佢哋串燒嘅醬汁先係重點，有沙嗲汁同泰式酸辣汁兩款，前者花生味香濃，唔少人都大推酸辣汁，話香辣惹味又清爽～

圖: cookowenl

傳統日式炸串 Jan Jan 串揚專門店 

由日本開到嚟香港嘅日式炸串，主打串揚，串揚即係串燒與天婦羅之間，串燒有一層薄薄嘅金黃炸衣，點上醬汁，食落香口又唔油膩，配返杯sake真係無得輸。呢個三文魚籽海鮮球幾特別，外皮香脆，加上三文魚籽嘅鹹香同蛋黃醬，口感同味道都好豐富。北海道帶子串都唔錯，帶子好大粒又彈牙，仲食得出鮮味～半熟煮玉子同免治鴨胸串揚都係必叫，前者一咬開就係滿滿流心蛋汁；後者就好多肉汁。

圖: glasgor

泰式串燒吧 Grill ขุนทอง

中環少見嘅泰式小食串燒店，係區內人氣之選，皆因佢性價比高呀。招牌串燒白鱔，外皮燒至薄脆, 肉質厚嫩又唔會乾, 少少腥味都無，仲有魚油香呀，配埋特色醬料一齊食非常惹味。串燒牛仔骨肉質軟腍牛味又重，筋位唔韌，可以完全痛快咁食乾淨骨邊肉。魷魚鬚口感爽彈，燒得香口惹味，最後甜品當然要食埋多汁燒菠蘿呀～

圖: 天天食好野

日式x川式 川燒

呢間串燒店呢就主打四川同日式fusion串燒，店內供應過百款串燒及燒物，每一次食都會有新鮮感！川香肉碎燒茄子以超過十款四川香料製成嘅川醬調味，好惹味。燒一口鵝肝多士入口即溶，配埋香脆多士令人驚喜。另外老細會每日到街巿購入最新鮮嘅海鮮，如象拔蚌、貴妃蚌、鮮魚及大虎蝦等，新鮮鮮甜，鍾意海鮮嘅朋友就啱晒。

圖: OL公主

高質港式串燒 肚餓了串燒烤焗專門店

尖沙咀抵食串燒店，黃金薯條同魚皮係必食，每一條都沾滿黃金醬，香氣夠重又唔會太重口味，熱氣都要食！海鮮類都有唔少，如冬蔭公錫紙包蜆，冬蔭公味香濃唔會太辣，蜆肉清甜無沙。汁燒鮑魚都好受歡迎，鮑魚本身新鮮彈牙，醬汁調味恰到好處又無蓋過鮑魚鮮味～

圖: hellohaheidi

文: Yanica