夏天係食榴槤嘅季節，就咁食正，但變做甜品仲正！一齊睇吓香港邊度有出色榴槤甜品啦～
貓山王榴槤麻糬蛋糕 LIFETASTIC 
選⽤兩款⾺來西亞優質榴槤入饌，推出貓山王榴槤麻糬蛋糕、D24榴槤斑蘭芝⼠蛋糕，聽到都覺得好吸引！貓山王榴槤麻糬蛋糕加入貓山王榴槤蓉，蛋糕頂層鋪上幼滑忌廉同厚實榴槤果⾁，夾層係海綿蛋糕包裹軟糯麻糬同忌廉，口感超多層次。D24榴槤斑蘭芝⼠蛋糕以⾺來西亞D24榴槤入饌，蛋糕頂層鋪滿榴槤蓉，配搭椰⼦果凍同忌廉；夾層則為斑蘭海綿蛋糕同榴槤忌廉交層錯疊，再加上底層嘅斑蘭忌廉芝⼠，三者超夾！
榴槤爽冰+榴槤湯圓 杏甜品
圖：以椰皇甜品出名嘅甜品店，但其實佢嘅榴槤產品都好出色㗎～好似呢個貓山王榴槤爽冰，上層係一大球榴槤肉，又軟又滑好似食緊雪糕咁；而下層嘅榴槤冰好香濃又綿密，真材實料。榴槤湯圓都值得一試，湯圓皮夠軟糯，一咬開，榴槤嘅香氣就爆發出嚟，配埋桂花糖水唔會太甜，一個人食晒成碗都唔會膩。
榴槤椰椰 糖宮甜品專門店
圖：喺大圍同尖沙咀都有分店嘅甜品舖，榴槤椰椰好受歡迎，由椰皇燉蛋白加上西米、小丸子同榴槤蓉組成，再跟配一球榴槤雪糕；蛋白又香又滑，配上香氣突出嘅榴槤好夾，小丸子同西米又可以增添口感，超豐富～
榴槤奶蓋豆花 豆乳狂人
圖：hokaykay
選用馬來西亞D24榴槤，上層係滿滿嘅榴槤蓉同自家製白玉，前者啖啖都好濃郁，後暫口感Q彈，煙煙韌韌，而奶蓋嘅鹹味令榴槤味更突出。底層就係自家製豆花，選用日本黃豆製作，豆香味超香濃仲好滑嫩，難怪咁受歡迎。
榴槤心太軟 一糖
圖：朱古力心太軟就食得多，榴槤心太軟你又食過未？呢個榴槤心太軟一定要上枱後趁熱切開，流出嚟嘅榴槤醬好濃稠，熱食嘅榴槤香氣更突出，外層嘅榴槤蛋糕亦非常鬆軟，一齊食就感受到雙重口感啦，加埋雪糕refresh吓，成個balance返。
文：Yanica
編：Cathy
