有時食飯唔想迫又想食好啲，可以試下呢類韓式嘅外賣店，可以食飽飽之餘價錢又唔太貴，味道都好正宗，今期介紹5間畀大家，鍾意韓國食物嘅你記得bookmark喇！

目錄

韓國媽媽主理 生生市場 

圖: or#ta66990173

元朗一間外賣韓國菜，其中一位合夥人係韓國人，所以店內嘅韓食好多都由佢媽媽親自製作，好有誠意！推介韓式無骨炸雞，分原味同甜辣口味，就算隔一陣食仍保持香脆，甜辣口味都唔太辣但好惹味。另外雜菜煎蛋捲都好足料，雞蛋捲超厚身蛋味又香，加埋蔬菜又多咗一份甜味同爽脆，入面加咗塊脆紫菜又令層次更豐富呀。另外仲有韓式飯捲、拌飯同午餐盒，無論你想食小食定正餐都滿足到！

多款韓式小菜 ZAN CHEE

圖: Keytofoodparadise

由韓國人主理，賣嘅係各式各樣韓式小菜同埋便當！便當會有一份主菜跟配5款小菜，主菜有烤排骨肉餅、烤牛肉及辣炒豬肉等，而5款小菜就每日都唔同～至於想回味一吓韓國嘅味道，佢哋嘅韓式小菜正宗之餘仲好多選擇，好似韓國醬油蟹、鵪鶉蛋、涼拌辣豆芽、炒魚糕、堅果炒魚仔等，連泡菜都有五款，好多小菜喺香港都好少見！

秘製正宗韓式豬手 韓食研究所

圖: BearbearxKoala、siumaluk

車站附近嘅韓式外賣小店，價錢親民，食物選擇又多元化，包裝整齊潔淨，唔想煮飯買佢就啱！秘製正宗韓式豬手，豬手肥瘦適中，外皮彈牙得嚟唔油膩，肉質都幾嫩，而且有超豐富嘅膠原蛋白質呀。另外呢個蟹膏醬拌飯都大推，味道香濃之餘多咗份鮮甜，蟹膏份量夠撈晒成個飯，啖啖都係蟹膏香。

韓國過江龍熱狗棒 Arirang Hotdog  

圖: couplefoodiehk

韓國人氣熱狗連鎖店，就算開到嚟香港都一樣咁高質～店舖供應十款口味，分基本款同芝士拉絲兩個系列，熱狗外皮以麵包糠混合麵糰同大米製成，炸得金黃酥脆，內層包住滿滿肉汁嘅香腸，好滿足啊！拉絲系列有五個口味，真係款款都超拉絲，啱晒芝士控！

生酮韓式飯捲 Azooms

圖: ki918

由幾位姨姨主理嘅韓式外賣小店，主要供應家庭韓國菜，所有食物都每日新鮮製作，抵食又大份！主打9款唔同口味嘅韓式飯捲，如牛肉、辣豬肉、小魚仔及特選咁，款款都足料到爆晒餡，性價比幾高～另外減肥嘅朋友都唔怕，餐廳有供應生酮飯捲，用咗雞蛋絲去代替白飯，健康又好味！

文：Yanica