5大黑芝麻甜品推介黑芝麻抹茶撻、漸層黑芝麻蛋糕

唔少人都對黑芝麻情有獨鍾，將佢加入甜品度簡直係perfect match！今期介紹5款喺香港幾高質素嘅黑芝麻甜品畀大家，甜品控仲唔快啲bookmark～

漸層黑芝麻蛋糕一草一木

深水埗一間好有空間感嘅cafe，更會播放大自然輕音樂，感覺舒服恬靜。招牌無常即係黑芝麻蛋糕，用唔同嘅忌廉同比例製成呢個好吸睛嘅六層黑芝麻蛋糕，白色部分有忌廉嘅奶香，黑色就有香濃嘅黑芝麻香氣，每一啖都有唔同嘅味道，而且甜度啱啱好，最底仲有加入黑、白芝麻嘅芝麻脆脆，口感又再豐富啲。

已經有接近30年歷史嘅甜品店，係港島區嘅人氣之選～呢度嘅甜品結合傳統同創新，好似黑芝麻布甸咁，結合咗中式食材同西式製法，口味方面奶味唔重反而黑芝麻味好突出，面層仲會加多一層芝麻糊，濃郁程度再次昇華。

主打法式甜撻嘅甜品店，唔少人都係特登為咗個黑芝麻抹茶撻而去㗎。上層正方形嘅抹茶慕絲軟滑細膩，茶味甘香醇厚，食完後香氣於舌尖上揮之不去。底層嘅黑芝麻慕絲味道同樣濃厚突出，同抹茶互相輝映，而撻底略帶可可甘苦，可以中和返甜度。

有時簡單就是最好的。呢間糖水店保留返八十年代中式糖水舖嘅格局，只賣20多款傳統糖水。招牌芝麻糊以古法製作，每朝都用電動石磨機磨製再用人手炒，加入香米和糯米質地更杰身，入口芝麻味香但味道好自然～

圖: 官方圖片

非牟利嘅蛋糕網店，店主Tiffany雖然身體上有障礙，但仍然勇敢地追求同實踐開設蛋糕店嘅夢想，好值得欣賞。佢哋嘅千層蛋糕足足有30層，每塊餅皮都薄到透光，食落唔會太感受到餅皮嘅存在，入口即溶，黑芝麻千層蛋糕香氣十足，上層有黑芝麻奶凍，中間有黑芝麻醬會食到沙沙地嘅口感，出色！

文：Yanica