刈包係台灣傳統小食之一，最常見係將腩肉、酸菜及花生粉等夾入麵餅中，鬆軟嘅餅皮加上香濃惹味又軟腍嘅五花腩，難怪咁多人鍾意食。今次介紹幾間喺香港主打刈包或者有賣刈包嘅店舖畀大家，仲有好多都係創新口味，睇下邊間帶到驚喜畀你～

目錄

香脆炸雞配炸刈包 BUN BUN

主打刈包嘅台式外賣店，真係款款口味都好有gimmick呀！好似慢煮豬腩肉配黑醋醬，呢個係傳統口味嘅變奏版，加入自家製黑醋醬就更清新，中和咗豬腩肉嘅油膩感。香脆炸雞配青醬都好出色，炸雞外皮炸得好脆，配埋羅勒醬、醃青瓜及炸羅勒葉又多咗一份層次同口感，仲有溏心蛋添～愛辣人士必食麻辣肉醬墨汁腸，香辣又惹味。每一款包都可以轉做金黃香脆嘅炸刈包，真係沒有最邪惡只有更邪惡！

圖: vanessafoodiary

元朗超人氣排隊店 倆口小吃

超多人排隊嘅小食店，想食要早啲去呀～仲啱啱入選咗2022米芝蓮必比登推介。傳統刈包加柚子醬一樣係令成個包冇咁膩，仲食到柚子醬嘅香氣。菠蘿炸雞刈包都係唔少人嘅推介，餡料有炸雞、菠蘿、羽衣甘藍、辣醬同果醬， 炸雞同菠蘿一向都好夾，一咬落去係滿滿肉汁同菠蘿汁。另外仲有泰式蝦餅配鹹蛋醬同埋黑蒜菇炸包，每一款口味都咁吸引。餐廳最近去埋中環開分店，港島嘅朋友有福啦。

圖: JCFOODGASM

正宗滷五花肉刈包 五月星牛肉麵

呢間餐廳就主打牛肉麵，但佢嘅刈包一樣咁高質素呀。佢嘅刈包就似返傳統嗰款，加入滷五花肉、酸瓜、酸菜同花生粉。五花肉超厚切！而且肥美又唔膩，酸菜就比起一般嘅更重口味，花生碎炸過再撈糖，食落夠晒香口，睇相都流晒口水呀～

圖: vanessafoodiary

三杯片皮鴨胸刈包 CHECK IN TAIPEI

一間新派啲嘅台灣菜，呢個三杯片皮鴨胸刈包有啲似食緊片皮鴨咁，不過餅皮就變咗刈包皮。上菜嗰陣個包仲係熱辣辣，鴨胸唔會乾身，油味好香，另外帶有淡淡三杯汁嘅香甜同酒香，啖啖肉好滿足！放入刈包同青瓜大蔥一齊食，口感更豐富，食落亦冇咁膩。

圖: glowsk

台灣老闆主理小店 FlyingBao

Soho區唔單止得酒吧同西餐，亦有呢間由台灣老闆主理嘅刈包小店。有六款配料選擇，經典嘅豬五花之外，其他口味個名都好過癮～例如辣台妹其實係炸雞配甜辣醬，沾點便宜吃豆腐就係純素豆腐版，鴨VO cuddle係煙燻鴨胸肉加牛油果同彩椒，意料之外又都幾夾。如果想走澱粉更可以要求用生菜取代刈包。

圖: likeeatgoodwest

文: Yanica