除咗紅館外，九展都係開show熱門場地， 好似人氣天團mirror兩個月前先啱啱開完～嚟緊仲會有林奕匡、趙學而、天堂鳥同萬眾期待嘅鍾培生x林作之戰都會喺九展舉行！咁精彩嘅活動當然要食飽先去睇喇，一齊睇下附近有咩醫肚好選擇！(傳送門：紅館篇按此)
18年歷史街坊米線 肥仔雲南小鍋米線
呢間有18年歷史嘅街坊米線本身位於荃灣，早前因為加租被迫結業後，最近已經喺九龍灣另覓新址重開喇！一重新開業已經受米線關注組熱捧兼且立即成為區內熱門食店，必試有招牌小鍋米線或紅薯粉，有酸辣同麻辣湯底選擇，濃味得嚟帶少少甜味，唔會太油，米線都爽滑彈牙～提一提大家微辣都已經幾辣下，所以第一次食唔好叫太辣呀。配料方面腩肉、索湯嘅螺旋藻及雞絲都唔錯。小食方面選擇都幾多，如炭燒豬頸肉、蒜泥白肉及麻辣豬耳等等，米線控ready！係就係要行遠少少，但一場入開九龍灣就試下啦～
同九展距離: 步行約22分鐘
圖: 濃郁番茄湯麵 蕃茄仔
銅鑼灣開過嚟嘅人氣麵店，番茄濃湯每日新鮮熬製，湯底濃厚杰身，食得出粒粒番茄蓉。配料方面超過十款選擇，好牛人士可以試下特級牛魔王，一份有齊牛肩胛、和牛𦟌、和牛肉丸同牛骨髓，絕對滿足到牛魔王。其他配料如烤厚鰻魚香甜惹味、有魚油香。炭烤風味雞扒都好有驚喜，麵底就有上海麵、刀削麵同稻庭烏冬揀，想食特別啲可以揀葛絲及米制通粉拌櫻花蝦！最後加上嘅炸乾蔥更令成碗麵生色不少。
同九展距離: 步行約12分鐘
圖: 日本過江龍 Hoi Hoi Pancake House
被稱為「名古屋No.1行列店」嘅日本過江龍pancake店！唔使講當然主打pancake喇，分別有夏威夷班戟同梳乎厘班戟，前者選用當地麵粉廠特意為HoiHoi調製嘅麵粉，鬆軟帶煙韌感，後者就偏鬆軟，有啲空氣感，蛋味就一樣咁香濃。不得不試係最近先出嘅班戟漢堡，可配鹹香嘅芝士、牛油果同蝦肉，甜鹹滋味令人愈食愈開胃～雖然餐廳主打甜品但鹹點都值得一試，秘製慢煮漢堡扒配手造麵包嘅漢堡扒由人手搓成3cm厚，再以密封式半蒸焗型式煮至全熟，肉質柔軟juicy。
同九展距離: 步行約10分鐘
圖: xmelissalamx、vanessafoodiary
田園風咖啡店 INN - I’m Not Nothing 
如果想近近地唔行咁遠，其實Emax內都有唔少好嘢食～好似呢間白色田園風咖啡店咁，黑白藤編座椅配上白色雲石檯，同時帶點歐陸風格，影相一流！餐廳提供各種沙律、意粉和扒餐，推介芥末籽蜜糖燒豬仔脾意大利飯，燒豬仔脾結實有咬口亦好多肉，意大利飯每一粒米都畀奶油醬汁包裹住，芥末籽中和返奶油嘅油膩感，幾出色呀～香蒜辣椒伏特加煮馬拉蜆亦係好受歡迎嘅菜式之一，香辣惹味之餘帶淡淡酒香，亦唔會蓋過蜆肉鮮甜。
圖: supertaster
高質魚生丼專門店 海街丼
九展內原來都有高質日本菜食！仲有得訂定位，咁時間就好預好多啦~ 呢間餐廳同樣來自日本，主打各式丼飯。招牌海寶丼分成三個等級，好似雜錦魚生飯咁已經包含唔同種類魚生同海產，特上等級嘅就包含赤身、章魚、玉子、甜蝦、鱈場蟹、海膽等。同坊間唔同嘅係魚生飯內都會加入特製啫喱醋，令成個飯嘅層次感更豐富。唔食生冷嘢都無問題，熟食丼飯都有好多選擇，如鹿兒島A4黑毛和牛丼，和牛滿滿油花入口即溶，另外仲有豚肉生姜燒丼同鰻魚丼，點都啱食！
圖: 文: Yanica
編：Kar