對毛孩嚟講，主人就係佢嘅世界，所以有好多養寵物嘅朋友其實每次出街都唔想留寵物喺屋企，但係喺香港地要隨時搵一間寵物友善嘅餐廳都係一個煩惱～今期開飯仔搵咗幾間寵物友善嘅餐廳畀大家，除咗西式餐廳同cafe，連小酒館、台灣菜、越南菜同日本菜都有，各位主人們又多幾個選擇喇。同時希望未來愈來愈多餐廳會pet friendly喇！
目錄
► 木系文青cafe：哈欠 |
木系文青cafe 哈欠
超適合主人同毛孩去玩返一個晏就嘅木系cafe，搬店之後地方更大更舒適，環境真係好啱相機食先～招牌菜有桂花蜜糖脆雞翼，香脆嘅雞翼配上桂花蜜糖，甜甜鹹鹹愈食愈好味。大阪燒香酥雞扒配牛角包窩夫都推介，大阪燒醬汁同窩夫嘅味道比想像中夾，好有驚喜。另外餐廳有一個專區係畀寵物進入，更有特意為寵物而設嘅Menu，咁毛孩們就唔使眼甘甘咁望住主人食喇！
圖: member_8326
食用花主題餐廳 Fleur (Tsuen Wan)
南豐紗廠一間素雅系cafe，以灰白色為主調，每道菜餚都以鮮花入饌或以花做裝飾，同埋主食每款都以lover命名，好浪漫呀。好似呢道Beef lover，美國封門柳配薯仔、香菇，豆苗及黑松露，封門柳煎得好香，牛味濃郁又軟諗，加埋啲配菜食好fresh。呢個AVO lover簡直好似藝術品咁靚，一道菜可以食到幾個唔同嘅味道，牛油果配自家製醃刁草加拿大三文魚、乾蔥牛油果他他大阪燒及溏心蛋配紅菜頭沙律醬，幾有特色～
圖: Miss Eva Or
上環手工啤小酒館 Blue Supreme
有無諗過去飲酒都可以帶埋寵物？上環呢間美式小酒館就得喇！呢間小酒館專門供應特色手工啤酒，主打酸啤類嘅啤酒，周不時都會有來自唔同產地同啤酒廠嘅啤酒試㗎。招牌菜有油封鴨腿漢堡，厚身嘅鴨肉上面有大大隻煎鴨蛋，鴨肉好juicy，鴨蛋嘅蛋香比起雞蛋更香濃。Beef and lamb muffin羊羶味好勁，愛羊嘅朋友必試。另外要試埋Steak and fries，牛肉表面煎至微焦內裡微粉嫩，肉汁豐富且軟腍，配上洋蔥汁後口感更佳！
圖: 台式酒吧餐廳 戀上台式料理 
將軍澳海傍嘅台式酒吧餐廳，餐廳採用半開放式設計，吹住海風食台灣菜特別開心㗎～呢度主打新式啲嘅台灣嘢，好似人氣鵝肝蚵仔魯肉溏心蛋飯，魯肉飯配肥美飽滿嘅蚵仔原來幾夾，加埋兩塊鵝肝同溏心蛋，一啖有齊鵝油豬油香，邪惡但真係好好食。小食方面質素都幾好呀，鹽酥大大雞扒香脆多汁又唔太鹹，黑松露黃金花枝丸彈牙，黑松露味都好濃厚。平時去台灣好多時都會食蔥油餅，呢度嘅千層三星蔥拉餅整到好多層咁，口感特別豐富！
圖: 法式越南餐廳 Le Garçon Saigon
裝修好有法式小酒館風味，供應嘅原來係法式越南菜，同平時我地認知嘅越南菜都幾大分別㗎！好似招牌Banh Xeo即係越式煎餅，入面夾住芽菜、炸蠔、炸蝦及蔬菜等食材，個皮香口之餘仲帶椰香味，好特別呀，用生菜包住嚟食又會再清新啲！DIY Spring Roll好玩又好食，自己可以揀肉類，豬肉用上沖繩豬梅花肉，燒烤過後好香炭火味，調味甜甜地半肥瘦充滿油香，而且肉質軟腍，好滿足～
圖: BlancheLeung
毛孩膳食套餐 ENSŌ
西環坐擁維港日落靚景嘅日本菜，最近推出全新嘅$688廚師發辦套餐，可以食到11道日式燒鳥雞肉料理，包括廚師嚴選嘅6款雞串燒、自家製免治雞肉棒、雞皮虎蝦及雞湯布烏冬等～雞串燒有雞冠、雞喉、雞掌心及雞蠔肉等好少見嘅部位，香燒雞皮虎蝦都好推介，虎蝦半身去殼後，裹上雞皮放上烤爐烤製，雞皮表面焦脆金黃，虎蝦肉則鮮嫩多汁。餐廳更特設毛孩膳食套餐，狗狗都可以一齊食到日式料理同蛋糕，一定好開心！
文: Yanica
