2017年貶下眼已經過咗一半，上半年嘅飲食界都算幾精彩，好多矚目餐廳隆重登場，亦創造咗唔少飲食潮流。好似今個月嘅走勢，好幾間餐廳都係最近流行嘅菜系代表，好似越式牛肉粉、吉列牛、餃子等等，即刻睇睇排行榜啦！
第10位 名館 (*新上榜)
網上瘋傳一張麻雀造型甜品嘅相，就係來自呢間摩登中菜館。菜式賣相精緻，好似宮延點心盤以圓型木架上枱，似足西式下午茶，創作點心銀湖天鵝酥、老鼠愛大米及北極熊仔包就以動物造型亮相，梗係要相機食先啦！除咗點心，亦有水煮、焗飯、燉湯等多款選擇，價錢以中環地段嚟都算抵食。
圖：第9位 Season Oyster & Wine Bar (*新上榜)
呢間蠔吧位置都幾偏，喺銅鑼灣與天后之間嘅信德街，所以食物價錢相對平啲。款式唔算多但抵食，每個月都有唔同優惠，好似之前曾推出過$9生蠔同$29法國蠔，吸引唔少生蠔控去試。生蠔以外亦有其他嘢食，好似凍海鮮、海膽多士、雞翼等小食，主菜就有意粉、薄餅同扒類，仲有唔少酒可以配蠔。
圖：第8位 坂奈 (*新上榜)
豊海鮮丼喺隔離開咗間日式燒魚專門店，只得一排幾個對住開放式廚房嘅吧座，似日式食堂feel。每日約有十款魚可以揀，有日本來貨嘅BB喜之次、吞拿魚腦天、竹籤魚、鯛魚同鯖魚等等，油脂、肉質同味道各有所長。所有魚都係原條即叫即燒，火光熊熊好有氣氛，魚皮燒到脆身香口，魚肉仲係又滑又juicy。
圖：第7位 Pho 778 (*新上榜)
呢排多咗好幾間越南餐廳，而呢間小店嘅老闆由加拿大回流，主打當地嘅越式牛肉河。安格斯牛肉河肉味重肉質嫩滑，湯底呈啡色，入口濃郁而且有少少藥材味。仲有食牛河必有嘅芽菜、九層塔、青檸同辣椒等配料，加埋是拉差辣醬，就係北美嘅食法！因為抵食又好味，每晚都有長長人龍。
圖：第6位 九份•十分 (*新上榜)
台灣菜都係香港人最愛之一，沙田河畔呢間新台式餐廳相當，招牌菜紅燒牛肉麵，牛肉入味，連牛筋都燜得好腍。鹽酥雞配埋六種調味粉，有芝士、原味、咖哩、梅子、香辣同紫菜味，用試管裝住好特別！其他食物包括厚多士、甜品就有窩夫同大大杯嘅沙冰，食完真係會掛住台灣架。
圖：第5位 風雲丸
呢間日本過江龍沾麵店，連續兩個月都上榜。主打豚骨魚介湯，個湯底用咗兩種豬骨湯、再加魚介粉、魚介醬油等落足料去熬㗎，上枱之前仲會加埋現場即磨嘅魚介粉，啲味唔濃郁就奇喇。每條沾麵沾落去，都索晒啲精華，最尾記住要追加香鬆飯呀。
圖：第4位 吉列牛忌廉烏冬專門店 (*新上榜)
位於旺角嘅呢間吉列牛店，由韓國開到過嚟香港。嚟到唔使諗，食吉列牛，食忌廉烏冬。牛肉上枱之前都輕輕炸過下嘅，但最後嗰步都係交由食客，自己夾上塊鐵板度燒多燒，想要幾成熟可以自己控制。點秘製沙律醬、豉油同wasabi食係幾香口。而忌廉烏冬就係忌廉加烏冬，仲混入咗薯蓉，奶香味都幾突出。
圖：第3位 芝樂坊餐廳
稍稍回落兩級，但依然保持三甲位置嘅The Cheesecake Factory，人氣都仲係好高企，想去食嘅要預多少少時間等位，又或者選擇外賣。佢哋嘅menu有超過200幾款主食同30款甜品，選擇困難症嘅朋友，推介可以試芝樂坊漢堡，長漢堡夾住大蕃茄、烤洋蔥、車打芝士、牛肉漢堡扒，超厚超足料，幾juicy，蛋糕就可以試下Tiramisu呀。BTW，提多句，佢哋每樣嘢嘅份量都幾大㗎。
圖：第2位 餃掂手工餃子雲吞專門店
呢間餃子店，由上個月嘅第9位，躍升到今個月嘅第2位，同佢哋多款特色餃子不無關係。龍鳳松茸雙灼餃係將松茸豬肉餡混埋黑松露、白松露，幾香呀，唔使加醬都夠味，當然如果你鍾意加都得，每張枱都有好多款醬汁喺度：青瓜呀、四川麻辣呀、芝麻呀、香辣呀之類。
圖：第1位 Meat King (*新上榜)
榮登6月榜首嘅Meat King，係第一次上榜㗎咋。呢度係食和風漢堡扒嘅，每塊都厚厚der，配上唔同嘅醬汁同食材，配搭多變。最受歡迎之一嘅漢堡扒應該係溫泉蛋他他汁漢堡扒，賣相吸引，洋蔥圈圍住溫泉蛋，輕輕拮一拮，蛋黃汁湧流出嚟好有畫面，仲令人好有食慾。塊扒本身肉汁都多，加埋酸酸甜甜嘅他他醬同辣辣地嘅洋蔥，層次豐富。
圖：文：Perrins、Kar